Քաղաքագետ. «ՀՀԿ–ն երկու մասի կտրոհվի». «Փաստ»

ՀԱՐՑԱԶՐՈՒՅՑ 1 Հունիս, 2018 7:12

«Փաստ» օրաթերթը գրում է.

Միջազգային և անվտանգության հարցերի հայկական ինստիտուտի (ՄԱՀՀԻ) ասոցացված փորձագետ, քաղաքագետ Ռուբեն Մեհրաբյանի կարծիքով՝ նոր իշխանությունը նախորդների ձախողումներից հետևություններ անելու կարիք չունի, բայց սովորելու մի բան, ըստ էության, կա: «Նախորդ իշխանությունների հիմքում քաղաքականության, պետության ու հանրության շահերի հետ առնչություն չունեցող մղումն էր: Իշխանությունն ուղղակի, այսպես ասած, բարիքներից օգտվելու համար էր, ինչն արվում էր հասարակության հաշվին: Ի դեպ՝ նրանք իշխանության չէին եկել, որպեսզի ուղղեին ձախողումները: Իսկ հասարակությունն, այնուամենայնիվ, չհամաձայնեց այդ տարբերակի հետ»,–«Փաստ»–ի հետ զրույցում ասաց Ռուբեն Մեհրաբյանը: Նրա խոսքով՝ հիմա միանգամայն այլ իրավիճակ է: «Տեսնում ենք նոր գործադիր իշխանություն, որը ոչ թե ինքնանպատակ իշխանություն ունենալու, այլ միանգամայն այլ նպատակներ է հետապնդում: Նոր իշխանությունը նախորդներից հետևություններ անելու ոչինչ չունի: Նրանց, մեծ հաշվով, տրված է սպիտակ թուղթ՝ ստացած մանդատով իրականություն դարձնել սեփական գաղափարները: Իսկ այդ մանդատը հանրության աջակցությունն է: Իսկ եթե ինչ–որ բան ունեն սովորելու նախորդներից, այն է, թե ինչպես չի կարելի կառավարել թե՛ քաղաքական, թե՛ տնտեսական, թե՛ մշակութային և թե՛ ցանկացած այլ ոլորտում»,–նշեց մեր զրուցակիցը: Ռուբեն Մեհրաբյանն ընդգծեց՝ նոր կառավարության գործունեության մեկնարկը խոստումնալից է, հուսադրող. «Բայց առայժմ մեկնարկային կետում ենք, հետևապես՝ սա այն ժամանակահատվածը չէ, որի ընթացքում մենք կարող ենք ինչ–որ արդյունքներ սպասել: Մի բան էլ՝ գոյություն չունի և չի կարող ունենալ մի կառավարություն, որն առանց հանրության աջակցության, առանց հանրության հետ կոոպերացման, կկարողանա ինչ–որ արդյունքների հասնել: Ներկայիս կառավարությունը սա շատ լավ է գիտակցում: Բացի այդ, հասարակության հետ հետադարձ կապը պետք է պահպանվի»: Կատարվածը իշխանափոխությո՞ւն, թե՞ հեղափոխություն էր, որը պետք է ավարտին հասցնել: Փորձագետի կարծիքով՝ հարցադրումը, այսպես ասած, ակադեմիական նշանակություն ունի: «Կարևորն այն է, թե ճգնաժամից որքանով անցնցում և անկորուստ դուրս կգանք: Իսկ մենք ճգնաժամի մեջ ենք, որը կավարտվի միայն արտահերթ ընտրություններով: Ներկայում գործ ունենք քաղաքական դաշտի վերաձևման հետ: Այդ գործընթացը դեռ սկզբնական փուլում է, մենք դեռ նոր զարգացումներ կունենանք: Նոր ուժեր կգոյանան, ասպարեզից հին ուժեր դուրս կգան, որոշ ուժեր էլ, որոնք փոքր էին, կընդլայնվեն: Ի վերջո, չմոռանանք, որ այժմյան Սահմանադրությամբ Հայաստանում քաղաքականությունը միայն կուսակցական կարող է լինել: Հետևապես կարծում եմ, որ Հայաստանում կուսակցական, այսպես ասած, շինարարության գործընթացները դեռ միայն սկզբնական փուլում են»,–հավելեց նա: Ստեղծվել է մի իրավիճակ, երբ ունենք փոքրամասնության կառավարություն և մեծամասնություն կազմող ՀՀԿ՝ խորհրդարանում: Զուգահեռ՝ մեծամասնություն կազմող ուժն իրեն հայտարարել է ընդդիմություն, թեև, ըստ սահմանադրագետների, իրավական կարգավորումներով ՀՀԿ–ն չի կարող ընդդիմություն լինել: Ռուբեն Մեհրաբյանի խոսքով, այս իրավիճակում լուծումը արտահերթ ընտրություններն են՝ ուրիշ ելք չկա: Հարցին, թե այնուամենայնիվ, երաշխիքներ կա՞ն, որ այս փուլում մեծամասնություն կազմող ՀՀԿ–ն կառավարության օրենսդրական նախաձեռնությունների ընդունումը չի խոչընդոտի, նա պատասխանեց. «Երաշխիխոչընդոտի, նա պատասխանեց. «Երաշխի քը ներկայիս կառավարության շատ լայն հանրային աջակցությունն է, որին դեմ գնալը ՀՀԿ–ի համար շատ դժվար կլինի: Իսկ ինչ կլինի դեմ գնալու դեպքում՝ տեսանք մայիսի 1–ին: Հետևապես՝ չեմ կարծում, որ ՀՀԿ–ն ունի այդ ռեսուրսը: Իսկ մյուս կողմից, եթե կառավարությունը ռացիոնալ առաջարկ է ներկայացնում, շատ դժվար է ոչ ասելը»: Ինչ վերաբերում է ՀՀԿ–ի տրոհման վարկածներին, որոնք առաջ եկան հատկապես այն ժամանակ, երբ երկու պատգամավոր լքեց խմբակցությունը, քաղաքագետն ընդգծեց. «Այնուամենայնիվ, կարծում եմ, որ ՀՀԿ–ն պայմանականորեն երկու մասի կտրոհվի: Մի մասը՝ ապաքաղաքական, պատեհապաշտ թևն է, որն այլևս ՀՀԿ–ում մնալու ռեզոն ուղղակի չունի: Մյուս մասը՝ պայմանականորեն ասած, քաղաքական, գաղափարական թևն է, որը պարզապես գնալու ուրիշ տեղ չունի»:

Շարունակությունը՝ «Փաստ» օրաթերթի այսօրվա համարում