Քննչական կոմիտեն անչափահասին մեղադրանք է առաջադրել ծանր մարմնական վնաս պատճառելու համար

 

ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ձեռնարկված անհրաժեշտ քննչական և դատավարական այլ գործողությունների արդյունքում պարզվել են Սարի Թաղում քաղաքացուն ծանր մարմնական վնաս պատճառելու դեպքի հանգամանքները: Մեղադրանք է առաջադրվել Երևանի անչափահաս բնակչին: Այս մասին «Արմենպրես»-ին տեղեկացրին ՀՀ քննչական կոմիտեից՝ հավելելով. «Քննությամբ ձեռք բերված տվյալների համաձայն՝ 2018թ. մայիսի 21-ին` ժամը 21:00-ի սահմաններում, Երևան քաղաքի Սարի Թաղ թաղամասի տներից մեկի բակում անձնական հարցերի շուրջ ծագած վիճաբանության ժամանակ Երևանի անչափահաս բնակիչը՝ ծնված 2000թ., իր մոտ եղած ծալովի դանակով հարվածել է 30-ամյա Ա.Ղազարյանի որովայնին՝ վերջինիս առողջությանը պատճառելով կյանքին վտանգ սպառնացող ծանր վնաս: Այնուհետև պատանին դիմել է փախուստի և հանցագործության գործիք հանդիսացող դանակը նետել Երևան քաղաքի «Գաջի» գործարանի հետնամասում գտնվող «Աղի» լիճը:

 

Ձեռք բերված բավարար ապացույցների համակցությամբ՝ Երևանի անչափահաս բնակչին մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասով, և հարցաքննվել։ Անչափահասի նկատմամբ որպես խափանման միջոց է ընտրվել ստորագրություն չհեռանալու մասին։

 

Նախաքննությունը շարունակվում է: Ձեռնարկվում են անհրաժեշտ միջոցներ՝ դեպքի հանգամանքների բազմակողմանի, լրիվ և օբյեկտիվ քննությունն ապահովելու ուղղությամբ:

 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով»: