Նաիրա Զոհրաբյան. «Հանրապետականները բարոյաֆինանսաիշխանական փաթեթային ճգնաժամի մեջ են». «Փաստ»

«Փաստ» օրաթերթը գրում է.

Ազգային ժողովի «Ծառուկյան» խմբակցության պատգամավոր Նաիրա Զոհրաբյանը, ուսումնասիրելով բարձրաստիճան պաշտոնատար անձանց հայտարարագրերը ու դրանք համեմատելով հայտնաբերված կո­ ռուպցիայի դեպքերի հետ, համարում է, որ ծիծաղելի արդյունքներ ունենք: Հիշեցնենք, որ ՀՀ գլխավոր դատախազը 2017–ի կառույցի գործունեությունը ներկայացնելու ժամանակ հայտարարել էր, որ անցյալ տարի հայտնաբերվել է կոռուպցիայի 163 դեպք, որից 43–ին պաշտոնյաներ են մասնակից եղել: «Հայտարարագրերից երևում է, որ քաղաքական պաշտոն զբաղեցնող ոչ քաղաքական պաշտոնյաներ ենք տեսնում, որոնց հայտարարագրերին կնախանձեին անգամ արաբական շեյխերը: Մենք հասկանում ենք, որ նախորդ իշխանությունը որպես դեմոկրատիայի դրսևորում ներկայացրեց ապօրինի հարստացման դեմ օրենքը, որը, բնականաբար, չէր կարող գործել նախորդ իշխանության ժամանակ այն պարզ պատճառով, որ Հայաստանի իրավական համակարգը «կրյուչոկով» կախված է եղել նախագահական նստավայրից: Հիմա հարցս շատ պարզ է` ե՞րբ են ուսումնասիրվելու հայտարարագրերը», – ՀՀ գլխավոր դատախազ Արթուր Դավթյանին հարցրել էր Ն. Զոհրաբյանը: «Փաստ»–ի հետ զրույցում Նարիրա Զոհրա­ բյանը, խոսելով նախկին պաշտոնյաների կուտակած հարստության մասին՝ նշեց, որ ինքն իրականում խոսել է շատ պարզ երևույթների մասին: «Հայաստանի անկախացումից ի վեր և հատկապես Հանրապետական կուսակցության իշխանության գալուց հետո դատաիրավական համակարգը ոչ միայն այլասերվել է,  այլև քառատակ ծալված և դրված է եղել մեկ տեղում, մեկ մարդու՝ նախագահի նստավարում, նախագահի աթոռի տակ: Եվ բոլոր որոշումների գերակշիռ մեծամասնությունը դատավորներն իրականացրել են նախագահականի զանգով: Սա փաստ է»,–ասաց Ն. Զոհրաբյանը: Պատգամավորը, համեմատելով բարձրաստիճան պաշտոնյաների կողմից ներկայացված հայտարարագրերն ու իրենց իրական ունեցվածքը, հանգել է այն եզրակացության, որ դրանք հիմնականում ձևակերպված են եղել իրենց «ազգականների, զոքանչների, զոքանչների քեռիների» անուններով: Ինչ վերաբերում է «Ապօրինի հարստացման» մասին օրենքին, ապա Ն. Զոհրաբյանի կարծիքով, եթե այս իշխանությունը մնար, այն այդպես էլ չէր գործելու: «Նախորդ հանցավոր իշխանությունը չէր կարող իր դեմ օրենք ընդունել: Սա փաստ է: Եվ ամենակարևորը: Ես խոսել եմ շատ պարզ բաների մասին, և հետաքրքիր է, թե ինչ–որ մեկը վերջապես զբաղվելո՞ւ է այն հարցով, թե ինչպես կարող էր քաղաքական պաշտոն զբաղեցնող պաշտոնյան, օրինակ՝ նախարարը, որը ստանում է այնքան աշխատավարձ, որքան ԱԺ պատգամավորը, աստղաբաշխական չափերի հասնող ունեցվածք ունենալ: Սա բացահայտ կոռուպցիա է: Եվ խոսքը չի վերաբերում մեկ կամ երկու անձի, այլ խոսքը տասնյակ և գուցե հարյուրավոր անձանց մասին է, ովքեր սեփական պաշտոնը և իշխանության մեջ սեփական դիրքը տարիներ շարունակ օգտագործել են ժողովրդին հարստահարելու, թալանելու, սեփական ունեցվածքը բազմա­ պատկելու համար: Եվ մինչ օրս ինչ որ արվել է, եղել է իմիտացիա և էժանագին վոդևիլ ու էժանագին շոու: Ես նաև ուզում եմ հասկանալ, թե արդյո՞ք պետական համակարգը, որտեղ գործող դատավորների գերակշիռ մեծամասնության մեջ սպանել են քաղաքացուն, իրավաբանին, մասնագետին և նրան դարձրել են կամակատար, ի վիճակի՞ է այլևս դատական վճիռ կայացնելու ժամանակ մտածել ու գործել անկախ և հաշվետու լինել բացառապես օրեն­քի առաջ: Սա կարևոր խնդիր է, որի շուրջ պետք է մտածենք»,–ասաց Ն. Զոհրաբյանը: Խոսելով ՀՀԿ խմբակցության ղեկավար Վահրամ Բաղդասարյանի և այլ հանրապե­տականների կողմից վերջին շրջանում հաճախ հնչեցվող ոչ կոռեկտ ռեպլիկների մասին՝ Ն. Զոհրաբյանն ասաց. «Պետք է հասկանալ, որ Հանրապետական կուսակցությունը գտնվում է լրջագույն բարոյաֆինանսաիշխանական փաթեթային ճգնաժամի մեջ, ուստի իրենցից յուրաքանչյուրի ո՛չ ադեկվատ և ո՛չ կառավարելի ռեակցիաներին ես անձամբ ըմբռնումով եմ մոտենում: Ես մարդասեր եմ»,–խոսքը եզրափակեց պատգամավորը: