Դրամահավաքներ, միջանձնային հարաբերություններ. «Փաստ»

«Փաստ» օրաթերթը գրում է.

Ապրիլից մինչև մայիսի 17–ն ընկած ժամանակահատվածում կրթության և գիտության նախարարության  «թեժ գիծ» հեռախոսահամարով ստացվել է 29 ահազանգ: Այս մասին «Փաստ»–ի հետ զրույցում հայտնեց Կրթության և գիտության նախարարության Տեղեկատվության և հասարակայնության հետ կապերի վարչության պետ Արթուր Բաղդասարյանը: Նա հայտնեց, որ ահազանգերից 24–ը վերաբերել են  դպրոցներում իրականացվող դրամահավաքներին. «Խոսքը ավարտական քննությունների, «Վերջին զանգի» դրամահավաքների, ֆոնդի և այլ գումարների մասին է: Մյուս հինգ ահազանգերը կապված են դպրոցի տնօրենների հետ: Բնույթը հետևյալն է.  տնօրեն–ծնող հարաբերություններ,  տնօրենների հետ կապված որոշակի խնդիրներ կան»: Արթուր Բաղդասարյանը շեշտեց, որ խնդիրները չի մանրամասնում, որովհետև դրանք նախևառաջ ուսումնասիրության կարիք ունեն. «Առավել ևս, երբ խնդիրները տնօրեն–ծնող կամ մանկավարժ–ծնող միջանձնային  հարաբերությունների մասին են: Իսկ ինչ վերաբերում է դրամահավաքներին, ապա բոլոր ահազանգերն ընդունվել են հեռախոսակապով: Բոլորին ընթացք է տրվել, ուղարկվել են նախարարին՝ համապատասխան հանձնարարական տալու համար»: Նշենք, որ ԿԳ նախարար Արայիկ Հարությունյանը հորդորել է դպրոցի տնօրեններին, որ վերջ տան դրամահավաքներին: Նա նաև հայտարարել էր, որ յուրաքանչյուր դեպքով տվյալները փոխանցելու է իրավապահ մարմիններին: Մեր զրուցակցից հետաքրքրվեցինք՝ կա՞ն ահազանգեր, որոնց դեպքով տվյալներն արդեն փոխանցվել են իրավապահներին: Նա ասաց, որ այս պահի դրությամբ այդ հարցին չի կարող պատասխանել: