Ալբերտ Ջաղացպանյանը ո՞ւմ է ասում «Միակն ես»

Past.am

- «Միակն ես» երգն ինչպե՞ս կյանքի կոչվեց:

 

- Ձայնագրման առաջարկը ստացել եմ «Միակն ես» երգի երաժշտության եւ բառերի հեղինակ Վարդան Գալստյանից: Ասեմ, որ դա միանգամայն համահունչ էր իմ ստեղծագործական փնտրտուքներին:

 

 

Իրականում, երբ երգչի կարիերան ես ընտրում, ապա առաջնային է դառնում լսարանին ներկայացնել մեղեդու եւ բառերի այնպիսի ներդաշնակություն, որը կհասնի նրանց հոգու ամենանուրբ լարերին: Համոզված եմ, երգի հեղինակը կարողացել է լուծել այս խնդիրը:

 

 

Մյուս կողմից, իմ անձնական կյանքում շատ կարեւոր ու հուզումնալից պահ է. ես պատրաստվում եմ ընտանիք կազմել իմ սիրեցյալի հետ, եւ սա հրաշալի առիթ էր արտահայտելու իմ սերը նրա նկատմամբ:

 

«Միակն ես» երգը կյանքի է կոչվել մի շարք տաղանդավոր եւ արհեստավարժ մարդկանց համատեղ տքնաջան աշխատանքի արդյունքում: Ես մեծ հպարտությամբ եւ երախտագիտությամբ կնշեմ նրանց անունները. երաժշտության եւ բառերի հեղինակ՝ Վարդան Գալստյան, ռեժիսոր՝ Գեւորգ Օլքինյան, օպերատոր, նկարահանումների գծով պատասխանատու՝ Վահե Համբարձումյան, Mix&Mastering-ի պատասխանատու՝ Արարատ Զաքարյան, երաժշտական գործիքավորող՝ Կարեն Նահապետյան:

 

- «Միակն ես» երգն ունի՞ հասցեատեր:

 

- Երգի հասցեատերը նեղ իմաստով իմ սիրելին է, որի հետ ես պատրաստվում եմ կյանքի երկար ճանապարհ անցնել: Հուսամ՝ նա եւս պատրաստ է դրան (հումոր): Լայն իմաստով երգս ուղղված է բոլոր սիրահարներին:

 

- Ռուսաստանաբնակ Ալբերտ Ջաղացպանյանն ինչպիսի՞ ընտանիքում է մեծացել:

 

- Ծնվել եւ մեծացել եմ մանկավարժների ընտանիքում: Հետխորհրդային տարիներին ծնողներս, ինչպես շատերը, ցավոք, կորցրեցին իրենց աշխատանքը: Կյանքիս առաջին 6 տարիներն անցկացրել եմ իմ ծննդավայրում՝ Ջավախքում, հաջորդ հինգ տարին՝ Հայաստանում՝ Երեւանում, իսկ այնուհետեւ ընտանիքս տեղափոխվեց Ռուսաստան, եւ պատանեկան տարիներից սկսած՝ բնակվում եմ Ռուսաստանի ամենահայաշատ քաղաքներից մեկում՝ Դոնի Ռոստովում:

 

- Հավատարմություն եւ սեր կա Ձեր երգում, իրականում այդ հասկացություններն ի՞նչ դեր ունեն Ձեր կյանքում:

 

- Իմ ողջ գիտակցական կյանքում ես փորձել եմ հավատարիմ լինել եւ դա եմ ակնկալել ինձ շրջապատող մարդկանցից: Սիրո հետ կապված կարող եմ մի բան ասել. երբ մենք արտագաղթում էինք Ռուսաստան, մայրս առաջին հերթին գրքերն էր վերցնում իր հետ: Եվ ամենակարեւոր գիրքը, որ ես ձեռքերումս ամուր սեղմած բերել եմ հայրենիքից, «Մանուկների Աստվածաշունչն» էր, որը, կարծում եմ, շատ մեծ դեր ունեցավ իմ մտահորիզոնի ձեւավորման հարցում: Այդ գիրքն իր բոլոր էջերից սեր էր քարոզում, իսկ ես չէի դադարում այն վերընթերցել կրկին ու կրկին: Այդպիսով մարդկանց ու աշխարհի հանդեպ սերն իմ աշխարհայացքի կարեւորագույն մաս դարձավ:

 

 

- Այսօր ՌԴ-ում ապրող հայ երիտասարդությունը կարողանու՞մ է պահպանել հայ ընտանիքին հարիր ավանդույթները:

 

- Գիտեք, իմ շրջապատում ապրող հայ երիտասարդները հիմնականում սերում են այնպիսի ընտանիքներից, որտեղ դեռեւս պահպանվում է հայի շունչն ու ոգին: Նրանց ծնողներն անում են անկարելին՝ իրենց զավակներին հայ պահելու համար: Բայց պետք է ընդունել նաեւ, որ արտաքին աշխարհն էլ իր հզոր ազդեցությունն ունի երիտասարդների ձեւավորման հարցում, եւ կարծում եմ, որ մենք կարողանում ենք պահպանելով մեր լավագույն ավանդույթները՝ ժամանակին համընթաց քայլել:

 

- Նորաստեղծ ընտանիքի կայացման համար կնոջ ո՞ր հատկանիշներն են կարեւոր:

 

- Իմ կարծիքով, ընտանիքի կազմավորման պատասխանատվությունը չի կարելի դնել միայն կնոջ վրա: 21-րդ դարում ընտանիքի կայացման համար շատ կարեւոր է միմյանց նկատմամբ սերն ու հարգանքը, փոխհամաձայնությունը, հանդուրժողականությունը, հարաբերական ազատությունը: Միայն այս հատկանիշների առկայության պայմաններում կարող ես կազմել ամուր ու երջանիկ ընտանիք: