Փետրվարին աճել է գյուղատնտեսական ու ձկնորսական արտադրանքը

2018 թ. փետրվարին գյուղատնտեսության և ձկնորսության համախառն արտադրանքը կազմել է 30 միլիարդ 427 միլիոն դրամ, որից գյուղատնտեսությունը 27 միլիարդ 794 միլիոն դրամ, իսկ ձկորսությունը՝ 2 միլիարդ 631 միլիոն դրամ: Իր հերթին գյուղատնտեսական արտադրանքն էլ տարանջատվել է անասնաբուծության և բուսաբուծության, որոնք կազմել են համապատասխանաբար՝ 27 միլիարդ 99 միլիոն ու 696 միլիոն դրամ: Այս մասին տեղեկանում ենք Ազգային վիճակագրական ծառայության պաշտոնական կայքից:

Ընդհանուր առմամբ, գյուղատնտեսության և ձկնորսության համախառն արտադրանքը նախորդ տարվա նույն ամսվա համեմատությամբ ավելացել է 0,2%-ով, իսկ այս տարվա հունվար ամսվա համեմատությամբ՝ 36,3%-ով:

Տարեսկզբի առաջին երկու ամիսներին էլ գրանցվել է 52 միլիարդ 710 միլիոն դրամ գյուղատնտեսության և ձկնորսության համախառն արտադրանք, ինչը նախորդ տարվա նույն ժամանակահատվածի համեմատությամբ աճել է 0,1%-ով:

Հրապարակումից նաև տեղեկանում ենք, որ ըստ ՀՀ գյուղատնտեսության նախարարության վարչական ռեգիստրի տվյալների՝ ձկնաբուծության ոլորտում այս տարվա փետրվարին կատարվել է 1 միլիոն 444 հազար 900 տոննա ձկան որս, որն ամբողջությամբ իրացվել է: Ձկնորսության ծավալները նախորդ տարվա նույն ժամանակահատվածի համեմտությամբ ավելացել են 0,9%-ով:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am