«Հարսնուփեսայի քվեարկությունը թատերական էպիզոդ Պուտին-պապայի համար». իրավապաշտպան

Երեկ ողջ համացանցի հայկական տիրույթում մի քանի լուսանկարներ էին պտտվում ՌԴ նախագահի ընտրությունների վերաբերյալ: Ռուսաստանի նախագահ էին ընտրում նաև Հայաստանում ապրող ՌԴ քաղաքացիները: Ընտրողները շատ էին: Արդյունքում դեսպանատան դիմաց այդ ընտրողների հերթեր էին գոյացել: Հերթեր էին նաև Գյումրու համապատասխան ընտրատեղամասի դիմաց:

Ֆեյսբուքահայությունը երեկ անխնա տարածում էր լուսանկարը՝ մակագրելով այն ամենատարբեր արտահայտություններով, իսկ այդ նկարների տակ արված մեկնաբանությունները լրիվ այլ «օպերայի» թեմա են:

Իրավապաշտպան Ժաննա Ալեքսանյանը Past.am-ի հետ զրույցում նշեց, որ անընդունելի է համարում այդպիսի որակումները մարդկանց ու հերթերի մասին: «Մարդիկ չեն կարողանում Հայաստանում ապրել և լքում են իրենց հայրենիքը: Հայաստանում ապրելու համար անհնարին պայմաններ են ստեղծված, և ինչպես գիտեք՝ Հայաստանից հեռացածների մեծ մասը տեղափոխվում է Ռուսաստան:

Մենք գիտենք, որ Ռուսաստանը պարբերաբար հայերին տեռորի է ենթարկում: Ռուսաստանի իշխանությունները մեկ ասում են, որ մեր վարորդական իրավունքը այնտեղ չի անցնում, մեկ այլ կերպ սահմանափակում են իրավունքները:

Այդ հերթերը գոյացել են այն պատճառով, որ իրենք պետք է Պուտին-պապային ցույց տան, որ նրանք սիրում են նրան և խոնարհաբար ընտրում: Կարելի էր քննադատել սա, բայց ոչ այդ որակումներով»,- նշեց մեր զրուցակիցը:

Իրավապաշտպանը անդրադառնալով նաև ՌԴ քաղաքացիություն ունեցող, բայց մշտապես Հայաստանում բնակվող քաղաքացիներին ասաց. «Ես ոչ մի բան չեմ արդարացնում: Մարդիկ ապրում են չքավորության պայմաններում: Հետո ինչ, որ նրանք ՌԴ քաղաքացի են դարձել ու եկել այստեղ: Կյանքն է այդպիսին: Կարծո՞ւմ եք՝ իրենք շատ էին ուզում այդպես ապրեի՞ն, բայց ինչ արած:

Այս իշխանությունը ոչ մի հնարավորություն չի տալիս, որ մարդիկ ապրեն, ուղղակի խեղդում է մարդուն, ստիպողաբար հանում է մարդկանց: Իշխանությունն ամեն ինչ անում է, որ Հայաստանը լքեն: Մենք չենք տեսնում որևէ մի քայլ, որ քաղաքացու համար նպաստավոր լինի, և քաղաքացին շարունակի այստեղ ապրել: Այդ սահմանափակումները, թանկացումները, չնչին աշխատավարձները: Ես ինչպե՞ս մեղադրեմ, որ նա Ռուսաստանում թոշակ է ստանում և գալիս այստեղ ապրում»,- նկատեց նա:

Իրավապաշտպանն անդրադարձավ նաև ՌԴ նախագահ ընտրող հարսնացուին՝ նշելով, թե դա արվել է մեր իշխանությունների ցուցումով, որպեսզի Վլադիմիր Պուտինը զվարճանա և հիանա, որ նորապսակներն իր համար, թողած իրենց ամուսնական վայելքը, գնում են իրեն ձայն տալու:

 «Պատկերացնում եք՝ ի՞նչ աստիճանի է Ռուսաստանի իշխանությունների ազդեցությունը Հայաստանում, ի՞նչ խորությամբ, որ արդեն մտել են ընտանիքներ: Վստահ եմ, որ նրանց ցուցում են տվել, ոչ մեկի մտքով չէր անցնի: Ո՞վ է Պուտինը մեր երկրի համար: Թող գնան այս իշխանությունները առավոտից իրիկուն նրա համար ձայն տան, որովհետև Պուտինի «թրի տակով» են անցել: Իրենց գործն է՝ մենք ենք տուժում:

Դա հատուկ մտածված թատերական մի էպիզոդ էր հատուկ Պուտին-պապայի համար, որ լավ աչքով նայի Սերժ Սարգսյանին, որ նրա երկրում ևս այդքան ստրուկներ կան, ինչպես իր երկրում՝ 76%»,- եզրափակեց Ալեքսանյանը:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am