Փողոցը ոչ ճիշտ վայրում հատողները կտուգանվեն

 

 

Առանց «զեբրայի» փողոցն անցնելու դեպքում մարդիկ Ճանապարհային ոստիկանության կողմից կտուգանվեն: Կտուգանվեն նաև այն դեպքում, երբ անցնեն սահմանված հատվածով, բայց կարմիր լույսի տակ:

Թեև Ճանապարհային երթևեկության անվտանգության ապահովման մասին օրենքի 25-րդ հոդվածի պահանջները(հետիոտների պարտականությունների, երթևեկելի գոտիները հատելու կանոնների մասին) նորություն չեն, սակայն ոստիկանությունը, հաշվի առնելով նախորդ տարի գրանցված վիճակագրությունը, այսուհետ ավելի զգոն է լինելու, իսկ տուգանվողների քանակն էլ՝ ավելի շատ:

Փողոցը չսահմանված վայրով հատելու դեպքում տուգանքը կկազմի 3 հազար դրամ, իսկ սահմանված վայրով, բայց ոչ կանաչ լույսի տակ անցնելու դեպքում՝ 5 հազար:

ՃՈ աշխատակիցների՝ նոր ու խստացված ռեժիմով աշխատանքի պատճառը նախորդ տարվա վիճակագրությունն է, համաձայն որի՝ 2017 թ. գրանցված 3 հազար 535 ճանապարհատրանսպորտային պատահարի 28,6%-ը ավարտվել է հետիոտնի վրաերթերով: Դրանց արդյունքում կյանքից զրկվել է 85 մարդ, իսկ 1028-ն էլ՝ վիրավորում ստացել:

28,6% կամ 1010 ՃՏՊ-ից 696-ի դեպքում հետիոտներն իրենք են մեղավոր վրաերթի համար, քանի որ չեն պահպանել Ճանապարհային երթևեկության անվտանգության ապահովման մասին օրենքի 25-րդ հոդվածի պահանջները:

Փողոցը սխալ վայրում հատելու հետևանքով 2017 թ. զոհվել է 58 մարդ, վիրավորվել՝ 636-ը: 696 դեպքից 217-ը կատարվել է անչափահասների մասնակցությամբ, որի հետևանքով գրանցվել է 6 զոհ ու 215 վիրավոր:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ