Իսրայել. խաղաղության ժամանակը դեռ չի եկել

«Փաստ» օրաթերթը գրում է

 

Երեկ Իսրայելի Պնախարար Ավիդգոր Լիբերմանը «Մեր տունն Իսրայելն է» պառլամենտական ֆրակցիայի առջև հանդես է եկել բրիֆինգով, որում մանրամասնել է ՑԱԽԱԼ–ի նոր ռազմավարությունը հումանիտար աղետի մեջ հայտնված պաղեստինյան Գազայի նկատմամբ:

ՊՆ–ի տարածած հաղորդագրությունից պարզ է դարձել, որ ՑԱԽԱԼ–ը խնդրո առարկայի վերաբերյալ 6 կետ է առանձնացրել, որոնց, Լիբերմանի խոսքով, պատրաստվում է խստորեն հետևել: Ռազմավարության 1–ին կետի համաձայն՝ բանակն առաջիկայում վերջնականապես է լուծելու գերեվարվածների և անհետ կորածների խնդիրը:

2–րդ կետի համաձայն (ի դեպ, այս առիթով նաև վարչապետ Բենիամին Նաթանյահուն Հնդկաստանում բավականին գլուխ գովեց, ուր այցելել է պաշտոնական այցով, գործարարների հետ միասին` նպատակ ունենալով զարգացնել իսրայելա–հնդկական հարաբերությունները հատկապես ՏՏ ոլորտում), բանակն աչքի տակ է առնելու ՀԱՄԱՍ–ի բոլոր դիվերսիոն թունելները լիկվիդացնելու խնդիրը և, մինչև 2018–ի վերջը, այդ մասին ողջ հանրությանն է զեկուցելու:

3–րդ կետն անմիջական աղերս ունի 2–րդի հետ, որովհետև վերաբերում է Գազայի սահմանին կառուցվելիք ստորգետնյա ինչ–ինչ կառույցներին, որոնք, իբր, կխոչընդոտեն ՀԱՄԱՍԻ՝ Իսրայել ձգվող թունելների կառուցմանը: Լիբերմանի կողմից հանրահռչակած 4–րդ կետն ընդգրկում է Գազայի ռազմական ռեսուրսների վերացմանն ուղղված կոնկրետ պատիժներ, որոնք բավական ցավոտ կլինեն վերջինիս համար:

ՑԱԽԱԼ–ի ղեկավարի խոսքով՝ ՀԱՄԱՍ–ը պիտի շատ արդյունավետ ու ցավոտ հարվածների արդյունքում չարաչար չղջա Իսայելի կողմն արձակված ամեն մի հրթիռի համար: Բնականաբար, կուժեղացվի նաև Գազա–Իսրայել ցամաքային սահմանի հսկողությունը, և սա ՑԱԽԱԼ–ի ռազմավարության 5–րդ կետն է:

Կառավարությունը համոզված է, և բանակն էլ պաշտպանում է կաբինետի այն մոտեցումը, որ Գազային սահմանակից իսրայելական բնակավայրերը պիտի բացարձակապես անվտանգ զգան իրենց ոչ միայն թիկունքի պաշտպանվածության, այլև բնակարանային ֆոնդի ապահովման, զբաղվածության և ընդհանրապես սոցիալ–տնտեսական առումով:

«Չի՛ կարելի թույլ տալ, որպեսզի մարդիկ հեռանան այդ տարածքից»,–հայտարարել է Լիբերմանը՝ 6–րդ կետում վերջապես անդրադառնալով նաև Գազայում ապրող պաղեստինցիներին: Բնականաբար, նախարարի խոսքում ափսոսանքի, կամ՝ այդ տարածքի հանրությանն ուղղված քաջալերանքի նշույլ անգամ չի նկատվել: Հակառակը՝ հետևյալ բանաձևով նա փորձել է սեպ խրել ՀԱՄԱՍ–ի և Գազայի բնակչության միջև՝ ընտրեք ՀԱՄԱՍ–ի ապազինումը, կստանաք շրջափակման վերացում:

«Ես շատ եմ լսում Գազայի սեկտորի հումանիտար իրավիճակի վերաբերյալ: Բայց պիտի նշեմ, որ ՀԱՄԱՍ–ի` 2017 թ.–ի բյուջեն կազմել է 260 մլն դոլար, որն ամբողջությամբ ներդրվել է հրթիռների արտադրության և դիվերսիոն թունելների կառուցման մեջ: Եթե այդ ներդրումներն արվեին, օրինակ, առողջապահության, կամ՝ ջրամատակարարման ոլորտում, հիմա այնտեղ բոլորովին այլ իրավիճակ կլիներ»,–չքմեղացել է ՑԱԽԱԼ–ի ղեկավարը՝ մի անգամ ևս պնդելով, որ Պաղեստինին միայն ուժի լեզվով է կարելի խոսք հասկացնել:

Մի բան, որին հակադարձել է Սիոնիստական ճամբարի ներկայացուցիչ, «Ավոդա» կուսակցության էքսղեկավար Խիլիկ Բարը: «Ես պաղեստինցի չեմ, ես իսրայելացի եմ, և ինձ համար կարևոր է ոչ թե այն, թե ինչ են ասում ՖԱԹՀ–ն ու ՀԱՄԱՍ–ը, այլ՝ ինչ է ասում Իսրայելը... Ցավոք, Լիբերմանն ուզում է ապացուցել, որ անհնար է խաղաղության հասնել երկխոսության միջոցով... նույն բանն էին ասում Մենահիմ Բեգինին, երբ նա Եգիպտոսի հետ էր ջանում խաղաղություն կնքել: Իբր՝ Սադաթը գործընկեր չէ, թշնամի է, և մենք ցածրանում ենք՝ նրան Կնեսետ հրավիրելով:

Նույնն ասում էին Հուսեյն թագավորի մասին, երբ Իսրայելը Հորդանանի հետ էր խաղաղություն կնքում: Բայց ունեցանք, չէ՞, խաղաղություն թշնամիների հետ, որոնք ավելի զորավոր էին, քան Պաղեստինը, և որոնց ձեռքով ընկած մեր իսրայելացիների թիվը ցայսօր ավելի մեծ է, քան պաղեստինցիների հետ բախումներում զոհվածներինը... առաջնորդներին ընտրում ես ոչ թե նրա համար, որ նրանք կառավարեն հակամարտությունը, այլ փորձեն լուծել դրանք:

Չեմ ասում՝ հեշտ է, չեմ ասում՝ եթե վաղը ես, Ցիպի Լիվին, Գաբայը դառնան վարչապետ, միանգամից ենք լուծելու այն: Բայց մենք գոնե կփորձենք՝ ի տարբերություն այս կառավարության, որն անընդհատ ավելի է բարդացնում ամեն ինչ՝ հայտարարելով, թե խաղաղության ժամանակը վրա չի հասել: Իսկ երբևէ նրանց համար այդպիսի ժամանակ եղե՞լ է»,– Խիլիկ Բարի հետաքրքիր դիտարկումներն է մեջբերել իսրայելական «Հաարեցը»:

 

Գոհար Սիմոնյան