«Ելք»–ը ելք չի գտնում

«Փաստ» օրաթերթը գրույմ է 

 

«Ելք»–ը դատական օրենսգրքում փոփոխությունների իրականացման կապակցությամբ այսօր փորձում է տապալել ԱԺ նիստերը՝ ըստ կանոնակարգի անընդհատ ընդմիջումներ պահանջելով: «Ելք»–ի զայրույթը հարուցել է նախօրեի քվեարկությունը, երբ Նապոլեոն Ազիզյանը սխալմամբ կողմ էր քվեարկել ու ԱԺ–ում սկսվել էր քաոտիկ իրավիճակ:

Իրավիճակն, իհարկե, տհաճ է, ոչ միայն տեխնիկական անփութության պատճառով: Փաստացի, «Ելք»–ը բախվում է հիասթափության պատի ու ըստ այդմ սկսում անորոշ շարժումներ անել: Մեղավորը բնականաբար «Ելք»–ը չէ: Իրենք չեն այդ իրավիճակի ստեղծողը: Իրենք պարզապես արձագանքում են:

Հետաքրքրականը հենց արձագանքն է: «Ելք»–ը կարծես թե շփոթվել է, որ գտնվում է ոչ թե Բունդեսթագում, այլ ՀՀ ԱԺ–ում: Այն խաղի կանոնները, որոնք թելադրվում են ԱԺ–ում, որտեղ իբրև թե քաղաքակիրթ երկխոսային մթնոլորտ է, բայց միշտ հաղթում է ՀՀԿ–ն, հնարավորություն է տալիս ընդդիմությանը, այս դեպքում՝ «Ելք»–ին, որոշակի սահմաններում ակտիվություն դրսևորել:

Ու հանկարծ, երբ ՀՀԿ–ն խախտում է ստերիլ կոռեկտության իր իսկ նորմերը, «Ելք»–ը սկսում է հիասթափություն ապրել ու անզորությունից նիստեր տապալել: Քաղաքական իրավիճակների փոփոխությունը «Ելք»–ը բավական ծանր է տանում, արտաքին ազդակները շատ ուժեղ են հունից հանում նրանց:

 

Արտակ Ասլանյան