Օմբուդսմենը չհասկացավ, որ չէր եկել դասեր տալու համար. Գալուստ Սահակյան

Մենք այդպես էլ չկարողացանք իրազեկել Կարեն Անդրեասյանին, որ ինքը եկել է պատգամավորների ներկայությամբ հաշվետվություն և ոչ թե դասեր տալու համար: Այդ մասին լրագրողների հետ զրույցում հայտարարեց ԱԺ նախագահ Գալուստ Սահակյանը` նշելով, որ նման պայմաններում կոնֆլիկտներ էլ կարող են լինել:

«Թեկուզ և եղան կոնֆլիկտներ, ես այդ քննարկումը շատ բարձր եմ գնահատում, քանի որ քննարկումներով, վեճերով է ամրանում տվյալ կառույցը: Այնպես որ դրանք կարելի է համարել խորհրդարանական իրողություններ և ոչ միայն մեզ մոտ, այլ ամբողջ աշխարհում այդպես է. ինչքան ակտիվ լինի խորհրդարանը, այնքան ակտիվ եմ գնահատում գործընթացները»,- ասաց ԱԺ նախագահը:

Հարցին, թե արդյոք վերջինս նույնպես բարձր է գնահատում Սամվել Ֆարմանյանի ելույթն ու Կարեն Անդրեասյանի հասցեին հնչեցրած արտահայտությունները՝ Գ. Սահակյանը նշեց, որ այդ ամենը համարում է ընդամենը տեսակետ:

«Կարող են տարբեր տեսակետներ լինել, նախ՝ օմբուդսմենը փորձեց ոլորտ առ ոլորտ ներկայացնել, բնական է, որ ցանկացած պատգամավոր յուրովի է պատկերացնում և ներկայացնում հենց այդ պատկերացումները: ՀՀԿ-ի կողմից էլ խոսեց Խոսրով Հարությունյանը և բավականին լուրջ վերլուծություններ ներկայացրեց և գնահատական, այն է, ինչը որ մի քիչ առաջ ասացի»,- մեկնաբանեց Գալուստ Սահակյանը:

Պատասխանելով Past.am-ի հարցին, թե արդյոք Կարեն Անդրեասյանի վրա «հարձակումը» պատվեր էր, ինչպես հենց ինքը՝ օմբուդսմենն է պնդում, ԱԺ նախագահը պարզաբանեց. «Գիտեք, մի տեսակ ազգն էլ է համերգային դառնում»:

Լիլիթ Լալայան