Կոալիցիայի միակ մարդը, ով համարձակվեց ասել, թե Սերժ Սարգսյանն անփոխարինելի չէ

«Փաստ» օրաթերթը գրում է

 

ԱԺ ՀՅԴ խմբակցության ղեկավար Արմեն Ռուստամյանը թերահավատորեն է վերաբերվում հարցումներին, որովհետև դրանք սովորաբար հակառակ արդյունքն են ցույց տալիս: Այս մասին այսօր՝ դեկտեմբերի 7–ին, խորհրդարանում լրագրողների հետ զրույցում ասաց ՀՅԴ խմբակցության ղեկավարն՝ անդրադառնալով Gallup International Association–ի անցկացրած հարցումներին:

Այդ հարցումների համաձայն՝ հարցվածների 26,7%–ը դրական է գնահատում ՀՀ նախագահի աշխատանքը, 26,2%–ը՝ ՀՀ վարչապետ Կարեն Կարապետյանի: Վարչապետի վարկանիշը 85%–ից հասել է 57–ի:

Հարցին, թե այս կերպ հող չե՞ն նախապատրաստում՝ 2018–ին Սերժ Սարգսյանին վարչապետ դարձնելու համար, Ռուստամյանը պատասխանեց.

«Հող նախապատրաստելու խնդիր չեմ տեսնում, ի՞նչ է, հարցումներո՞վ են հող նախապատրաստում: Հող նախապատրաստում են գործողություններով»:

Ըստ Ռուստամյանի՝ վարչապետի վարկանիշը ոչ թե իջել է, այլ ճիշտ հակառակը:

«Հանրային ընկալմամբ կարող է դա չերևալ, որովհետև տեմպերը գոհացուցիչ չեն, իսկ փոփոխությունների ուղղությունը ճիշտ է ընտրված և պետք է տեմպերն ավելացնել»,– նշեց Արմեն Ռուստամյանը:

Հարցին՝ կա՞ հանրապետականի շարքերում անձ, որը կփոխարինի Սերժ Սարգսյանին, ասենք, արտաքին քաղաքականության հարցում. «Անփոխարինելի մարդիկ չկան, իսկ արտաքին քաղաքականությունը, բնականաբար, պետք է ավելի նոր որակով և մակարդակով իրացվի, խորհրդարանական համակարգը ենթադրում է թիմային աշխատանք»:

Իսկ Կարեն Կարապետյանը կկարողանա՞ փոխարինել Սերժ Սարգսյանին հարցին, Ռուստամյանը պատասխանեց. «Ինչո՞ւ չէ, Կարեն Կարապետյանը ցույց է տվել, որ չի՞ կարող, իհարկե, կարող է»: