Ամեն ինչ արվում է, որպեսզի հայկական գյուղմթերքները ԵԱՏՄ շուկայում «իրենց զգան ինչպես տանը». Սերգեյ Սիդորսկի

 Եվրասիական տնտեսական միությունը կողջունի հայկական շուտահաս մրգերի ու բանջարեղենի` ԵԱՏՄ շուկա արտահանումը: Այս մասին Եվրասիական զարգացման բանկի 10-րդ տարեկան համաժողովի շրջանակներում լրագրողների հետ զրույցում հայտնեց Եվրասիական տնտեսական հանձնաժողովի Արդյունաբերական և ագրոարդյունաբերության նախարար, Կոլեգիայի անդամ Սերգեյ Սիդորսկին: 

Նա նշեց, որ մոտ երկու ամիս առաջ Հայաստանում էր, որտեղ հանդիպել է ՀՀ գյուղատնտեսության նախարարին ու քննարկել այն մոտեցումները, որոնց շնորհիվ հայկական ապրանքները ԵԱՏՄ տարածքում «կզգան իրենց ինչպես տանը»: 

«Ինձ շատ հաճելի է, երբ Մոսկվայում մտնում եմ խանութ ու տեսնում, որ հայկական գյուղատնտեսական ապրանքները փոխարինել են այն ապրանքներին, որոնք առաջ ներկրվում էին միության շրջանակներից դուրս գտնվող երկրներից: Դուք ունեք առավելություն, ձեր ապրանքը, մաքսային հարկերից ազատվելով, դարձել է մրցունակ ու առկա է հնարավորություն ջերմոցային արտադրանքը, վաղ աճող բանջարեղենն ու մրգերը Հայաստանից արտահանել ԵԱՏՄ շուկա: Մենք դա ողջունում ենք»,-ասաց Սերգեյ Սիդորսկին: 

Պաշտոնյան կարևորեց մոտեցումը, ըստ որի ԵԱՏՄ շրջանակներում առևտուրը պետք է կատարվի ազգային արժույթներով: 

Իսկ այն, որ «Doing business» վարկանիշային սանդղակով Հայաստանը բարելավել է դիրքն ու հայտնվել 35-րդ տեղում, Սիդորսկու կարծիքով հիանալի է: Նա նշեց, որ ԵԱՏՄ անդամակցությունից հետո Հայաստանը գրեթե երկու անգամ մեծացրել է ապրանքների իրացման ծավալները միությունում շրջանակներում:

Հոկտեմբերի 29-ին Մոսկվայում ընթանում է Եվրասիական զարգացման բանկի 10-րդ համաժողովը, որի շրջանակներում քննարկվում են տնտեսության, ֆինասավարկային ինտեգրացիայի ոլորտներոմ ռազմավարական համագործակցության ուղղությունները, ինչպես նաև ԵԱՏՄ շրջանակներում միջպետական համագործակցության ամրապնդմանը վերաբերող խնդիրներ: