Ա. Հովհաննիսյան. «Որևէ մեկը իր հայեցողությամբ ընտանիք չի մտնելու»

ԱԺ փոխնախագահ Արփինե Հովհաննիսյանի կարծիքովբ հանրային քննարկումների արդյունքում ընտանիքում բռնության կանխարգելման և դրա դեմ պայքարի մասին օրենքի լրամշակված նախագիծը գրեթե փարատում է հանրության մոտ առկա մտահոգությունները:  «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագծի քննարկման ընթացքում նաև նշեց, որ օրենքի նախագծի հետ կապված մտահոգությունների պատճառն այն է, որ Հայաստանի Հանրապետության քաղաքացիները ավանդական և հատուկ վերաբերմունք ունեն ընտանիքի ու ընտանեկան արժեքների նկատմամաբ:

«Մեզանից յուրաքանչյուրը ընտանիքում ավանդական արժեքների  վերաբերյալ ունի իր մոտեցումը: Յուրաքանչյուրը իր ընտանիքում ունի իր անհատական բանաձևը, երբ իր տան շեմից մտնում է ներս, ունի իր ընտանեկան ավանդական արժեքները, որոնք այլոք կարող են չկիսել»,- նշեց Հովհաննիսյանը:

ՀՀ ԱԺ փոխնախագահը հստակեցրեց, որ ներկայացված օրինագիծը կկարգավորի այն դեպքերը և հարաբերությունները, որոնք շեղվել են բնականոն հունից և որտեղ պետության աջակցության կարիքը մարդը զգում է, և ոչ թե որևէ մեկը գալու է մտնի ընտանիք: Նա վստահեցրեց, որ որևէ մեկը իր հայեցողությամբ ընտանիք չի մտնելու, քանի դեռ ընտանիքի անդամներից որևէ մեկը չի հայցել պետության աջակցությունը: