Պապիլոմա վիրուսի դեմ պատվաստանյութը գնել և ներկրել է ՄԱԿ-ի մանկական հիմնադրամը, ՀՀ-ն դրա համար չի վճարել. պաշտոնյա

Պապիլոմա վիրուսի դեմ պատվաստանյութը ներկրվել է ՅՈՒՆԻՍԵՖ-ի ՄԱԿ-ի մանկական հիմնադրամի միջոցով, ինչպես մեր բոլոր պատվաստանյութերը: 

Այս մասին Tert.am-ի հետ զրույցում ասաց Առողջապահության նախարարության իմունականխարգելման ազգային ծրագրի ղեկավար Գայանե Սահակյանը` անդրադառնալով հարցին, թե պատվաստանյութը որ երկրի արտադրանք է և ինչ երաշխիքներ են ներկայացվել:

«ՄԱԿ-ի մանկական հիմնադրամն իր ֆինանսական միջոցներով գնել է պատվաստանյութը մեկ ընկերությունից, ոչ թե նվեր է ստացել արտադրողի կողմից: Սա ինչ-որ բան ասո՞ւմ է, թե ոչ»,-ասաց նա և նշեց, որ թեև ՄԱԿ-ը գնել է, սակայն մեր երկիրը դրա համար գումար չի վճարել:

«ՄԱԿ-ը բոլոր պատվաստանյութերը ստուգում է համագործակցող լաբորատորիաների միջոցով և մեզ ներկայացնում է բոլոր փաստաթղթերը, սերտիֆիկատները, որտեղ երևում է հստակ, թե ինչ փորձաքննություն, հետազոտություն է անցել և համապատասխանելիությունը օրիգինալ փաստաթղթերին, պահանջներին»,-ասաց նա և նշեց, որ տվյալ չափաբաժնի համար բոլոր փաստաթղթերը, սերտիֆիկատներն անպայման ստանում են:

«ՄԱԿ-ի մանկական հիմնադրամին մենք պետք է կասկածի տա՞կ առնենք: Արտադրողն ինքը արտադրում է, բայց չի տալիս եզրակացությունը, մեկ այլ լաբորատորիա է վերահսկողություն իրականացնում տվյալ արտադրանքի առումով»,-ասաց նա:

Նշենք, որ կառավարության որոշմամբ 2017թ. դեկտեմբերից իրականացվելու են մարդու պապիլոմա վիրուսային վարակի դեմ պատվաստումներ 13 տարեկան աղջիկների շրջանում: Որոշումը տարատեսակ, այդ թվում՝ բացասական արձագանքներ է ստացել հասարակության շրջանում։