Սուր շնչառական վարակների առումով իրավիճակը հանրապետությունում սեզոնին համապատասխան է. Լ. Թորոսյան

Սուր շնչառական վարակների առումով իրավիճակը հանրապետությունում սեզոնին համապատասխան է։ Այս մասին Tert.am –ի հետ զրույցում նշեց ՀՀ Առողջապահության նախարարության աշխատակազմի վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը:

«Օրինաչափ վիճակում ենք սուր շնչառական վարակների առումով: Վերջին շաբաթում ուղղակի գրիպի Բ տեսակի երեք հաստատված դեպք ունենք՝ թեթև, որոնք իրենց բուժումները ստացել են և ունեն դրական դինամիկա»,-ասաց Թորոսյանը:

Լիանա Թորոսյանի խոսքով` բացի այն, որ գրիպի հարուցիչներ են շրջանառվում, կան նաև այլ սուր շնչառական վարակների հարուցիչներ:

«Տարբեր հարուցիչներ են շրջանառվում: Վիճակը տրամաբանական է, որ պետք լինեն, չլինել չեն կարող, որովհետև 40-րդ շաբաթից ՀՀ-ն գտնվում է գրիպի սեզոնի մեջ: Գրիպի Ա տեսակի դեռևս որևէ դեպք չի գրանցվել»,-ասաց Թորոսյանը։

Նա նաև նշեց, որ սուր շնչառական վարակների պարագայում վտանգավորության աստիճանը կամ տևողությունը կախված է օրգանիզմից, կարող են լինել բարդություններ քրոնիկ հիվանդների մոտ կամ երեխաների շրջանում: Առողջապահության նախարարությունից առաջին ու անփոփոխ հորդորը՝ ինքնաբուժությամբ չզբաղվելն է:

«Ինքնաբուժությամբ չզբաղվել, դիմել բժշկական հաստատություններ, առողջ ապրելակերպ վարել, հաճախակի օդափոխել տարածքը և ամենակարևորը զերծ մնալ հակաբիոտիկների օգտագործումից»- ասաց Լիանա Թորոսյանը:

Նրա խոսքով, քանի որ գրիպի հարուցիչը վարակն է, բակտերիաներին սպանող հակաբիոտիկները չեն կարող ոչ մի կերպ օգնել գրիպի դեպքում: Դրանք միայն կարող են վնասել. գրիպի ժամանակ մարդու իմունային համակարգը թուլանում է, և օրգանիզմն ավելի խոցելի է դառնում: Եթե մարդը հակաբիոտիկներ է ընդունում, դա միայն էլ ավելի է նպաստում իմունիտետի թուլացմանը, քանի որ վնասակար մանրէների հետ մահանում են և օգտակարները:

Լիանա Թորոսյանը նաև տեղեկացրեց, որ նախորդ շաբաթվա տվյալներով՝ պոլիկլինիկական հաստատություններում գրանցված սուր շնչառական վարակների դեպքերը 2 500-ն են ամբողջ հանրապետությունում: Նախորդ տարվա նույն ժամանակահատվածում այս թիվը եղել է 4 000-ը: 2015-2016 թվականներին՝ 2 300-ի սահմաններում: