Վանաձորի քաղաքացիների սպասարկման գրասենյակը կմատուցի բարձրորակ ծառայություններ

ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը  նոյեմբերի 29-ին  Վանաձորում մասնակցել է  Քաղաքացիների սպասարկման գրասենյակի (ՔՍԳ) պաշտոնական բացման արարողությանը: Միջոցառմանը ներկա են եղել ՀՀ Լոռու մարզպետ Արթուր Նալբանդյանը, Վանաձոր համայնքի ղեկավար Մամիկոն Ասլանյանը, ՀՀ-ում Գերմանիայի Դաշնային Հանրապետության արտակարգ և լիազոր դեսպան Մաթիաս Քիսլերը, ԱՄՆ ՄԶԳ ապակենտրոնացման ծրագրի մասնագետ Արթուր Դրամփյանը, ինչպես նաև քաղաքացիական հասարակության ներկայացուցիչներ: Այս մասին «Արմենպրես»-ին տեղեկացրին ՀՀ տարածքային կառավարման և զարգացման նախարարության հասարակայնության հետ կապերի բաժնից:

Ողջունելով ներկաներին, Վաչե Տերտերյանն ասել է, որ քաղաքացիների սպասարկման գրասենյակի հիմնումը թույլ կտա «մեկ պատուհան, մեկ կանգառ» սկզբունքի համաձայն վանաձորցիներին  մատուցել բարձրորակ ծառայություններ: «Մենք շատ ոգևորված ենք հանրապետության խոշոր քաղաքներից մեկում այս գրասենյակի բացմամբ, քանի որ այստեղ  հնարավորություն կունենանք դիտարկել դրա աշխատանքը: Այն  մեզ համար նաև լավ բազա, հիմք կհանդիսանա պետական մեր աշխատանքերը կազմակերպելու առումով: Այս գրասենյակի բացումով մեր պատկերացումները  և սպասումները չեն ավարտվում, այլ հակառակը, մենք մի նոր հարթակ ենք ձևավորում, որը հնարավորություն կտա էլ ավելի հրապարակային դարձնել թե  ավագանու նիստերը, թե աշխատակազմի աշխատանքը և թե  ապահովել քաղաքացիների մասնակցությունը ՏԻՄ որոշումների կայացմանը»,-ասել է Վաչե Տերտերյանը: Նա  շնորհակալություն է հայտնել Հայաստանի գործընկեր պետությունների, ծրագրին աջակցող բոլոր միջազգային կազմակերպությունների ներկայացուցիչներին,  ինչի արդյունքում Հայաստանի բազմաթիվ  համայնքում գործում են քաղաքացիների սպասարկման գրասենյակներ և  տեղեկատվական համակարգեր:

Վանաձորի գրասենյակը հիմնադրվել է Գերմանիայի միջազգային համագործակցության ընկերության (ԳՄՀԸ)  կողմից իրականացվող «Լավ տեղական ինքնակառավարում Հարավային Կովկասում» ծրագրի շրջանակում Գերմանիայի տնտեսական համագործակցության և զարգացման դաշնային նախարարության աջակցությամբ` Հայաստանում Շվեյցարիայի զարգացման և համագործակցության գործակալության (ՇԶՀԳ) և ԱՄՆ միջազգային զարգացման գործակալության (ԱՄՆ ՄԶԳ) համաֆինանսավորմամբ: «Լավ տեղական ինքնակառավարում Հարավային Կովկասում» ծրագիրն իրականացվում է ՀՀ տարածքային կառավարման և զարգացման նախարարության հետ համատեղ։ 

Վանաձորի համայնքապետարանում և  նորաբաց գրասենյակում  աշխատանքներն իրականացվելու  են  Համայնքային կառավարման տեղեկատվական համակարգի (ՀԿՏՀ) կիրառմամբ, որը որպես ՏԻՄ-երի համար մշակված տեղեկատվական համակարգ՝ թույլ է տալիս ապահովել տեղեկատվական հոսքերի ավտոմատացված կառավարում համայնքապետարանում: Համակարգը նպաստում է քաղաքացիների նկատմամբ ՏԻՄ-երի հաշվետվողականության և թափանցիկության աստիճանի բարձրացմանը, մատուցվող ծառայությունների վրա ծախսվող ժամանակի կրճատմանը: Համակարգի միջոցով հնարավոր է բնակիչներին մատուցել առցանց ծառայություններ, հետևել դրանց ընթացքին, իսկ հարցերի դեպքում  առցանց դիմել համապատասխան մասնագետներին:

Հիշեցնենք, որ 2015թ-ից սկսած` ծրագրի շրջանակում հիմնվել են տասներեք գրասենյակ Շինուհայր, Թումանյան, Աբովյան, Արտաշատ, Զառիթափ, Պեմզաշեն, Ուրցաձոր, Աշտարակ, Ալավերդի, Գորայք, Ամասիա, Արփի և Մեղրի համայնքներում: