Էրդողանն օգտվում է ռուս-թուրքական «մերձեցում»-ից՝ փորձելով ԼՂ կարգավորման հարցում ստատուս-քվոն փոխել. թուրքագետ

Թուրքիայի նախագահ Ռեջեփ Թայիփ Էրդողանն օգտվում է ռուս–թուրքական «մերձեցումից»՝ փորձելով ստատուս քվոյի փոփոխության հասնել, Թուրքիայի նախագահի հայտարարությունը, որ Արցախի հիմնախնդիրը կարող է լուծել միայն Ռուսաստանը, Tert.am-ի հետ զրույցում այսպես մեկնաբանեց թուրքագետ Անուշ Հովհաննիսյանը: 

«Դա նշանակում է, որ Թուրքիան շահագրգռված է, իհարկե Ադրբեջանի հետ միասին, այդ ստատուս քվոն, որը ինչ-որ ձևով, շատ փխրուն ձևով գոյություն ունի, տեղից շարժել:  Էրդողանն օգտվում է ռուս-թուրքական, այսպես ասած, մերձեցում եկեք չանվանեք, բայց ինչ-որ չափով հարաբերությունների ակտիվացումից և ուզում է ինչ-որ սակարկության միջոցով գուցե մի բան շահել: Այսինքն՝ ստատուս քվոյի փոփոխության խնդիր կա դրված, բայց չեմ կարծում, որ հիմա, Ռուսաստանն այս պահին շահագրգռված լինի ստատուս-քվոն փոխի, բայց թուրքական կողմից այդ ցանկությունը կա»,- ասաց թուրքագետը: 

Թուրքական «Այդընլըք» պարբերականի հաղորդմամբ Էրդողանը հայտնել է, որ Լեռնային Ղարաբաղի հիմնահարցը լուծելու ունակ միակ ուժը Ռուսաստանն է և որ առիթի դեպքում Սոչիում կայանալիք գագաթնաժողովին կբարձրացնի նաև արցախյան հիմնախնդրի հարցը:

«Դա բաց տեքստով չի ասվում և կարծում եմ, որ Սոչիի գագաթնաժողվում շատ ավելի կարևոր առաջնային խնդիրներ կան, որոնցով շահագրգռված են թե՛ Ռուսաստանը, թե՛ Թուրքիան: էրդողանը և՛ Ղրիմի թաթարների մասին իր կարծիքը հայտնեց, և՛ Արցախի խնդրում իր կարծիքը հայտնեց, բայց ռեալ ինչ-որ բաներ, համենայնդեպս, բացահայտորեն մենք չենք տեսնում: Ցանկությունը կա՝ փոխել ստատուս քվոն, բայց առաջնային խնդիր չէ դա»,- ասաց Հովհաննիսյանը:

Թուրքագետը նաև նկատեց, որ Ռուսաստանի համար  առաջնային նշանակության շատ այլ խնդիրներ կան այս պահին: 

«Ռուսաստանն այսօր շատ ավելի բարդ խնդիրներ ունի լուծելու, դա նույն Սիրիայի հարցն է, որը միջազգային օրակարգում առաջնային է, Եվրոպայի հետ հարաբերությունները, Ռուսաստանի դեմ կիրառվող պատժամիջոցների խստացման խնդիրը, որ կա և որ պետք է դիտարկվի ամերիկյան Կոնգրեսում, այսինքն՝ առայժմ առաջնային չէ»,– ասաց նա:

Tert.am-ի դիտարկմանը, թե արդյոք հայկական կողմը, մասնավորապես դիվանագիտական կորպուսը չպետք է համարժեք պատասխան տա Էրդողանի նմանատիպ հայտարարությանը, թուրքագետը պատասխանեց, որ նման հայտարարություններն անպատասխան չի կարելի թողնել:

«Ինչ- որ պատասխան անպայման պետք է լինի: Հայկական դիվանագիտական կորպուսը, իհարկե, պետք է պատասխան տա դրան՝ հայտարարելով իր սկզբունքային դիրքորոշումը. այն, որ ասենք ինչ-որ մեծ խաղացողներ, իհարկե, դերակատարում ունեն, բայց, իհարկե, առանց Արցախի ժողովրդի կարծիքը հաշվի առնելու և առանց ռեալ, իրական վիճակը, որ ստեղծվել է այս պահին, հաշվի առնելու, որևէ մեկը նման հայտարարություններ անել չի կարող առավել ևս Թուրքիան, որը ոչ թե չեզոք դիրքորոշում ունի այս հարցում, այլ անթաքույց կոնֆլիկտի կողմերից մեկին է աջակցում: Այնպես որ նման հայտարարություններն անպատասխան չեն թողնում»,- եզրափակեց թուրքագետը: