Երեւանում տեղի ունեցած ավտովթարի հետեւանքով հիվանդանոց է տեղափոխվել 8 երեխա

Այսօր Երեւանում տեղի ունեցած ավտովթարի հետեւանքով 8 երեխա տեղափոխվել է «Սուրբ Աստվածամայր» բժշկական կենտրոն:

Կենտրոնի տնօրենի ժամանակավոր պաշտոնակատար, վիրաբուժության գծով փոխտնօրեն Դավիթ Դալլաքյանը, մեր հարցին ի պատասխան՝ անդրադառնալով տուժածների վիճակին, տեղեկացրեց, որ նրանց հոսպիտալացնելու անհրաժեշտություն չի զգացվել, իսկ երեխաներից երեքն ընդհանրապես վնասվածքներ չեն ունեցել:

«Մեզ մոտ տեղափոխվել է 8 հոգի, որից 5-ը ունեցել է թեթեւ վնասվածքներ՝ մարմնի տարբեր հատվածներում, հիմնականում՝ գլխի շրջանում: Նեյրովիրաբույժի, դիմածնոտային վիրաբույժի կողմից հետազոտվել են, եւ ոչ մեկին հոսպիտալցնելու կարիք չի եղել»,- ասաց Դավիթ Դալլաքյանը:

Վնասվածքներ ստացած երեխաներից ամենամեծը ծնվել է 2008 թվականին, ամենափոքրը՝ 2011-ին:

Ավելի վաղ հայտնի էր դարձել, որ այսօր՝ նոյեմբերի 22-ին, ավտովթար է տեղի ունեցել Երեւանում: Ժամը 13:00-ի սահմաններում Մանանդյան եւ Մանթաշյան փողոցների խաչմերուկում՝ Շենգավիթ ծննդատան հարեւանությամբ, բախվել են 40-ամյա Վաչիկ Գրիգորյանի վարած ГАЗ 32213 մակնիշի 33 70 Տ համարանիշի եւ 28-ամյա Սարգիս Պապյանի վարած Toyota Corolla մակնիշի 425 AC 61 համարանիշի ավտոմեքենաները: Առաջինը ներքաղաքային համար 44 երթուղին սպասարկող միկրոավտոբուս է, երկրորդը՝ տաքսի:

Ինչպես դեպքի վայրից հայտնել է ֆոտոլրագրող Գագիկ Շամշյանը, վթարի հետեւանքով 10 հոգի մարմնական վնասվածքներով տեղափոխվել են «Սուրբ Աստվածամայր» բժշկական կենտրոն:

Ոստիկանությունը պարզում է վիրավորների ինքնությունը, ովքեր, ըստ ֆոտոլրագրողի տեղեկությունների՝ երեխաներ են եղել: