Փոքր Մանթաշում շուտով ձմեռ կլինի, բայց բնակիչների ջեռուցման հարցը լուծված չէ

Շիրակի մարզի Փոքր Մանթաշ համայնքում այսօրվա դրությամբ դեռևս բնակիչների մեկ երրորդից ավելին՝ 40%–ը, ջեռուցման խնդիր ունի: Համայնքի ղեկավար Ժիրայր Հակոբյանը «Փաստի» հետ զրույցում նշեց, որ գյուղն ամբողջությամբ գազաֆիկացված չէ: Այս խնդրով դիմել են և՛ կառավարություն, և՛ մարզպետարան, և՛ անգամ «Հայռուսգազարդ»–ին, սակայն ամենուրեք խոստացել են ընդառաջել ֆինանսական միջոցների առկայության դեպքում: 

Փոքր Մանթաշի բնակիչներն էլ մինչ այսօր սպասում են այդ ֆինանսավորմանը, որը տարիներ շարունակ չի լինում: Ըստ Հակոբյանի՝ կառավարությանն առաջին անգամ դիմել են 2011 թ. և յուրաքանչյուր տարի էլ դիմում են: Տարիներ առաջ սկսված գազաֆիկացման ծրագիրը անավարտ է մնացել՝ խողովակաշարի 4 կմ–ը չի կառուցվել: Ու անավարտ մնալու պատճառը կրկին ֆինանսների պակասն էր: 

Փոքր Մանթաշի բնակիչներն իրենց ձմռան վառելափայտը հիմնականում գնում են Վանաձորից: Փայտն այնտեղից են բերում: Բայց այս տարի շատ քիչ են բերել, այդ պատճառով էլ ջեռուցման հարցը շատ լուրջ է, դրան գումարած նաև թանկացումներ են եղել: 

Չնայած Փոքր Մանթաշի անվան մեջ փոքր բառի առկայությանը՝ բնավ փոքր համայնք չէ այն. ունի 760 տնտեսություն և 3050 բնակիչ: Եվ այդ 760 տնտեսության 40%–ը առաջիկա ձմեռը իր տունը տաքացնելու ոչ մի տարբերակ կարծես թե չունի: Չնայած որ այնտեղ արդեն իսկ շատ ցուրտ է: Գյուղը գտնվում է ծովի մակերևույթից 220 մետր բարձրության վրա, տարվա ուղիղ կեսն էլ՝ վեց ամիսը, ձմեռ է: Գյուղացիները դիմում են գյուղապետարան, գյուղապետն էլ հարցն ամեն տարի ներկայացնում է կառավարությանը, սակայն պատասխան չի ստանում: 

«Անտառից փայտ բերելն արգելված է, դրա համար էլ գները թանկացրել են, մեկ շարքը՝ հինգ խորանարդ մետրը, արժե 140 հազար դրամ: Բայց ժողովրդի ձեռքին նման գումար չկա»,– նշեց գյուղապետը:

Հարցին՝ բացի պետական ատյաններից այլ կառույցների կամ մարդկանց փորձել են դիմել, պատասխանեց, որ փորձում են բարերարներ գտնել, բայց նրանց գործերն էլ լավ չեն: Եթե նախկինում կարողացել են օգնել, ապա հիմա դժվարանում են:

«Ութ տարի առաջ եղբայրներս օգնեցին գյուղին, ներդրում կատարեցին և գազաֆիկացման ծախսերի 10 տոկոսն իրենց վրա էին վերցրել: Սրանից հինգ տարի առաջ լավ էր, օգնում էին, գյուղում ջրագծեր քաշեցինք, եկեղեցին վերանորոգեցինք»,– պատմեց Հակոբյանը: 

Դիտարկմանը, թե տարիներ շարունակ խուսափողական պատասխաններ ստանալը անտեսված լինելու մտքեր չի՞ բերում, պատասխանեց, որ բնավ էլ այդպես չի համարում՝ նշելով, թե անտեսված չեն, իրենց գյուղը հզոր, հանրապետական գյուղ է: Հարցրեցի՝ նկատի ունեք շատ են հանրապետականները, ինչին պատասխանեց՝ չէ, ուղղակի հզոր գյուղ ենք, միշտ հանրապետության նախագահի ու կառավարության կողքին ենք եղել նախագահի լավ աշխատանքի համար. Շիրակի մարզում բավական մեծ ծրագրեր ու աշխատանքներ կատարեց, մարդկանց շենքերը կառուցեց:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ