2 մարդու կյանք խլած վթարից շուրջ 4 տարի անց. դեռ վկաներ են հարցաքննվում

Գյումրի-Երեւան ավտոճանապարհին 2014թ. մարտի 11-ին 2 մարդու կյանք խլած վթարի գործով դատաքննությունը դեռ շարունակվում է. մի քանի նիստ է՝ հարցաքննվում են պաշտպանական կողմի միջնորդությամբ հրավիրվող վկաները:

NEWS.am-ի թղթակցին տուժողի իրավահաջորդի ներկայացուցիչ Ռուբիկ Մովսիսյանը հայտնեց, որ նոյեմբերի 17-ին նշանակված նիստում սպասվում է, որ կշարունակվեն վկաների հարցաքննությունը:

«Կարծում եմ՝ ժամանակի իզուր ձգձգում է, մենք սպասում ենք, թե երբ կավարտի դատաքննությունը, որովհետեւ արդեն 3 տարի 8 ամիս տուժող կողմը սպասողական վիճակում է»,- ասաց պաշտպանը:

Նշենք, որ ըստ մեղադրանքի՝ ողբերգական վթարի օրը Գուրգեն Համբարձումյանն իր վարած «Ֆոլկսվագեն Ջետտա» մակնիշի մեքենայով դուրս է եկել իր երթեւեկելի գոտուց, մտել հանդիպակաց երթեւեկելի գոտի եւ թեքությամբ հարվածել իր երթեւեկելի գոտով դեպի Երեւան ընթացող Արամայիս Քանանյանի վարած «Վազ 2106» մակնիշի ավտոմեքենային: Վթարի հետեւանքով վարորդ Արամայիս Քանանյանը եւ զոքանչը` Սիլվա Գեւորգյանը, մահացել էին, իսկ մյուս ուղեւորուհին` Ռուզաննա Ղազարյանը, ծանր մարմնական վնասվածքներով տեղափոխվել էր հիվանդանոց:

Գուրգեն Համբարձումյանին մեղադրանք է առաջադրվել Քրեական օրենսգրքի 242-րդ հոդվածի 3-րդ մասով, նա գրավի դիմաց ազատ է արձակվել: Համբարձումյանին մեղադրանք էր առաջադրվել դեպքից շուրջ մեկ տարի անց, քանի որ փորձաքննությունների եզրակացություններն ուշ էին ստացվել: