ՀՀ-ում Ղազախստանի դեսպանը համագործակցության հարցեր Է քննարկել Հայաստանի ԶԼՄ-ների ներկայացուցիչների հետ

 Հայաստանում Ղազախստանի դեսպան Տ.Ուրազաեւը նոյեմբերի 16-ին հանդիպում Է ունեցել հանրապետության զանգվածային լրատվամիջոցների գլխավոր խմբագիրների հետ: Ինչպես նշվում Է հանդիպման արդյունքների վերաբերյալ տարածված մամուլի տեղեկագրում, ամենամյա հանդիպման ընթացքում Ղազախստանի դիվանագիտական ներկայացուցչության ղեկավարը, ներկաներին շնորհավորելով երկու երկրների միջեւ դիվանագիտական հարաբերությունների հաստատման (1992 թվականի օգոստոսի 27) 25-ամյակի առթիվ, համառոտ ծանոթացրել Է երկկողմ համագործակցության վիճակի եւ հետագա զարգացման հեռանկարների հետ, տեղեկացնում Է «Արմենպրես»-ը:

Դեսպանը հատուկ ուշադրություն Է դարձրել 2017-2018 թվականներին ՄԱԿ-ի Անվտանգության խորհրդում անդամության Ղազախստանի գերակայությունների, 2014-2020 թվականներին Ղազախստանի արտաքին քաղաքականության հայեցակարգի հիմնական դրույթների եւ նախագահ Նուրսուլթան Նազարբաեւի «Ղազախստանի երրորդ արդիականացումը. գլոբալ մրցունակություն» ուղերձի վրա: Այս համատեքստում Ուրազաեւը տեղեկացրել Է 2018 թվականի հունվարին ՄԱԿ-ի ԱԽ-ում Ղազախստանի նախագահությանը նախապատրաստվելու մասին, որի գլխավոր թեմաները կդառնան Կենտրոնական Ասիայի եւ Աֆղանստանի վերաբերյալ բանաձեւի առաջմղումը, ինչպես նաեւ ահաբեկչությանը հակազդելու հարցերը:

Իրենց կողմից հայկական ԶԼՄ-ների ներկայացուցիչները պատմել են երկրի տեղեկատվական քաղաքականության առանձնահատկությունների եւ իրենց գործունեության առաջնային ուղղությունների մասին: Առաջարկվել Է ղազախական ԶԼՄ-ների հետ ընդլայնել համագործակցությունը Ղազախստանի եւ Հայաստանի հասարակական-քաղաքական եւ փորձագիտական շրջանների համար կարեւոր միջոցառումների ներկայացման հարցում: Բացի այդ, հանդիպման մասնակիցները քննարկել են ԵԱՏՄ-ի շրջանակներում տեղեկատվական ոլորտում Ղազախստանի եւ Հայաստանի համագործակցության ընթացիկ վիճակն ու հեռանկարները:

Զրուցակիցները հատկապես ընդգծել են Եվրասիական տարածքում ինտեգրացիոն գործընթացների անաչառ լուսաբանման անհրաժեշտությունը՝ նպատակ ունենալով նպաստել ինտեգրացման ընդլայնմանն ու արդյունավետության բարձրացմանը, ԵԱՏՄ-ի մասնակից պետությունների համախմբմանը տեղեկատվական անվտանգության շրջանակներում: Հանդիպման արդյունքում մասնակիցները պայմանավորվել են շարունակել կառուցողական համագործակցությունը երկկողմ շահերին համապատասխանող իրադարձությունները լուսաբանելիս: