Ցավալի է, բայց ուսանողների կողմից հանդիպման մեր հրավերն անտեսվեց. Արծրուն Հովհաննիսյան

ՀՀ Պաշտպանության նախարարության մամուլի խոսնակ Արծրուն Հովհաննիսյանն անդրադարձել է «Հանուն գիտության զարգացման» խմբի կողմից ՊՆ նախարար Վիգեն Սարգսյանի հետ հանդիպումը մերժելու փաստին: Ուսանողները դասադուլ են հայտարարել՝ պահանջելով պահպանել ներկայում գործող ակադեմիական տարկետման իրավունքի սկզբունքները: ՊՆ-ի առաջարկած «Զինվորական ծառայության եւ զինծառայողի կարգավիճակի մասին» օրենքի նախագծով առաջարկվում է խիստ սահմանափակել այդ իրավունքը: Ուսանողները նաեւ հանդիպում են պահանջել պաշտպանության, կրթության եւ գիտության նախարարների հետ: ՊՆ-ն նրանց հանդիպման հրավեր է ուղարկել, որը, սակայն, մերժվել է:

«Ցավալի է, բայց այսօր «Հանուն գիտության զարգացման» խմբի կողմից մեր հրավերն անտեսվեց: Կրկնակի անհասկանալի է, որ նրանք պահանջում էին ՀՀ ՊՆ Վիգեն Սարգսյանի հետ հանդիպում, սակայն հանդիպման հրավերից հրաժարվեցին: Չնայած այն հանգամանքին, որ այլ ԲՈւՀ-երի ուսխորհուրդներից հրավիրվել էին երկու ներկայացուցիչներ, իսկ իրենց խմբից համաձայնեցինք ընդունել չորս ներկայացուցիչի, նրանք միեւնույնն է, երկար մտածելուց հետո, հրաժարվեցին»,- գրել է Արծրուն Հովհաննիսյանը ֆեյսբուքի իր էջում:

Ավելի վաղ ուսանողները բացատրել էին մերժման պատճառը: Նրանք նշել է, որ բավարար տեղեկություն չեն ունեցել հանդիպման ձեւաչափի մասին, չեն իմացել՝ ովքեր են մասնակիցները, լրատվամիջոցներ լինելու են, թե՝ ո՛չ: