Հայ պատգամավորները Չեխիայում քննարկել են նաև մեր խաղողի արտահանման հարցը

Ինչպես հայտնում է Past.am-ը, ԱԺ գյուղատնտեսական և բնապահպանական հարցերի մշտական հանձնաժողովի պատվիրակությունը hոկտեմբերի 19-ից 22-ը գտնվում էր Չեխիայում:

Այսօր ԱԺ պատգամավորներ Մարտուն Գրիգորյանն ու Լյովա Խաչատրյանը լրագրողներին ներկայացրեցին այցի ընթացքում ունեցած կարևոր հանդիպումներն ու պայմանավորվածությունները: Պատվիրակության անդամները պատմեցին, որ այցելել են խմելու ջրի մաքրման կայաններ, ձիաբուծարաններ, հանդիպել գյուղոլորտի պատասխանատուներին:

Ըստ Մարտուն Գրիգորյանի՝ Չեխիայում մեծ հետաքրքրություն է առաջացրել հայկական խաղողը: Գրիգորյանն ասաց, որ չեխերին պատմել են խաղողի առատ բերքի մասին, որի արդյունքում գյուղացիների մոտ առաջացել էր իրացման խնդիր: Բանախոսները հայտնեցին, որ Չեխիան իր գինու արտադրության հումքի 40 տոկոսն է միայն սեփական ռեսուրսներով ապահովում:

Չեխիայում պատվիրակության անդամները նաև քննարկել են Հայաստանից խաղող արտահանելու հարցը:

«Մենք կարող ենք նրանց հրավիրել, որպեսզի առարկայական քննարկենք, թե ինչ կարող ենք տալ և ինչ կարող ենք վերցնել»,- ասաց Մարտուն Գրիգորյանը՝ հավելելով, որ այս հարցերին պետք է ուշադրություն դարձնի նաև ՀՀ կառավարությունը:

Պատգամավոր Լյովա Խաչատրյանի խոսքով` տնտեսական կապերի ամրապնդման գործում մեծ է Չեխիայում Հայաստանի դեսպանի գործը: «Այն ժամանակներն անցել են` եկեք սիրենք, պաչենք, Գեղարդ տանենք. հիմա գործելու ժամանակն է: Պետք է մտածենք, թե ինչ ունենք տալու, ինչ` վերցնելու»,- նշեց Լյովա Խաչատրյանը:

Լևոն Փանոսյան