Հակտեմբերի 27-ի թնջուկը. ևս մեկ զոհ

Այսօր կալանավայրում մահացել է Հոկտեմբերի 27-ի գործով դատապարտված Էդուարդ Գրիգորյանը: Գրիգորյանը վերջերս հայտնել էր, որ պատրաստվում է նոր մանրամասներ հաղորդել հոկտեմբերի 27-ի մասով: Իսկ դրանից հետո հայտնի դարձավ, որ առաջիկայում մի շարք ցմահ դատապարտյալների գործեր քննվելու են ՝ նրանցից ոմանց ազատություն շնորհելու համար:
Դժվար է ասել ՝ Գրիգորյանը կար պոտենցիալ համաներման շանս ունեցողների շարքում, թե ոչ, կամ արդյոք նա կարող էր էական մանրամասներ բացահայտել հոկտեմբերի 27-ի գործով: Բայց ընդհանուր տպավորությունն այնպիսին է, որ նրա մահվան փաստը ուղղակիորեն կապված է նրա վերջին օրերի հայտարարությունների հետ:

Հոկտեմբերի 27-ի գործը տարեցտարի կորցնում է բացահայտման ու վերաբացման բոլոր շանսերը: Պատահաանությամբ կամ դիտավորությամբ թաքցվում ու կոծկվում են ինֆորմացիայի հնարավոր աղբյուրները, որոնք կարող են լույս սփռել բացահայտման վրա: Պարզ է մի բան, որ ներկայիս քաղաքական համակարգի պայմաններում այդ գործը դժվար թե բացահայտվի: Մյուս կողմից էլ կարծիք կա, որ համակարգը չի կարող փոխվել, եթե այդ գործը բացահայտված չէ: 

Ամեն դեպքում ՝ 27-ի գործը օր օրի ավելի առեղծվածային բնույթ է ստանում: Այն, ըստ էության, դուրս է մղվել առօրեականից ու մատուցվում է որպես պատմության ցավոտ ու ողբերգական էջ: Ավելին գնալու կամք իշխանությունը չունի: Թերևս չունի ոչ միայն սուբյեկտիվ, այլև օբեկտիվ պատճառներով:

Արտակ Ասլանյան