Հայաստանի պառլամենտի գրոհը ռուսական ուղղությամբ

Երեկ կայացավ ՌԴ դաշնային ժողովի և ՀՀ ԱԺ միջև միջպառլամենտական հանդիպում: Ռուսական պատվիրակության ղեկավարը նախ դժգոհ էր, որ իրենց չեն ընդունել վարչապետն ու կաթողիկոսը: Բայց այդ դժգոհությունը արարողակարգայինից վերածվեց բովանդակային, երբ հերթով սկսեցին ելույթ ունենալ հայաստանցի պատգամավորները: Թե ԵԼՔ-ը ներկայացնող Էդմոն Մարուքյանի, թե Ծառուկյան դաշինքը ներկայացնող Նաիրա Զոհրաբյանի ելույթները բավականին տհաճ ենթատեքստեր ունեին:

Բարձրացվում էին ադրբեջանական կողմին զենք վաճառելու, Արցախ այցելելու, Ռուսաստանում հայ վարորդների աշխատանքային իրավունքներին վերաբերող հարցեր: Անընդհատ հիշեցվում էր մոտ ժամանակներս ԵՄ հետ Հայաստանի ստորագրելիք շրջանակային համաձայնագրի մասին: Այս բոլոր փաստերը հնչում էին հաջորդաբար ՝ շոկի մեջ գցելով ռուսական կողմին:

Ռուսական պառլամենտը Հայաստանի պառլամենտից առավել թույլ է: Այն առումով, որ եթե Հայաստանում գոնե պառլամենտական քննարկումները դիսկուրսի մաս են կազմում, Հայաստանն էլ գոնե դե յուրե պառլամենտական երկիր է, ապա Ռուսաստանում պառլամենտի հանդեպ ուշադրությունը զրոյական է, իսկ քաղաքական կյանքի կենտրոնում բացառապես Պուտինն է:

Եվ ռուսական պառլամենտի թուլությունն ու արդիականության պակասը դրսևորվեցին նաև երեկ, երբ շոկի մեջ հայտնած ռուս պառլամենտարիստները որևէ էական հակադարձում այդպես էլ չարեցին:

Արտակ Ասլանյան