Կասպից ծովի մակարդակը 4 մետրով կբարձրանա. բնապահպան

Կասպից ծովի մակարդակի բարձրացումը կշարունակվի մինչեւ 2030 թվականը եւ այդ ժամանակհատվածում ծովի մակարդակը 4 մետրով կբարձրանա:

Այս մասին, moderator.az-ին հայտնել էադրբեջանցի  բնապահպան ԹելմանԶեյնալովը:

Նրա խոսքով` ծովի մակարդակի այդչափ բարձրացման հետեւանքով Բաքվի ներկայիս լողափերը կհայտնվեն ջրի տակ:

Ըստ ադրբեջանցի բնապահպանի` Կասպից ծովի մակարդակի բարձրացումը մի քանի պատճառ ունի:

«Դրանցից առաջինը հոսող գետերի ջրերն են, երկրորդը` Կովկասյան եւ Թալիշական լեռները, որոնցում դեռեւս շարունակվում է բարձրանալու գործընթացը, ինչն էլ հանդիսանում է ծովի բարձրանալու պատճառը: Երրորդ պատճառը Խաղաղ օվկիանոսի հետ ինչ-որ կերպ Կասպից ծովի կապված լինելն է: Կասպից ծովի մակարդակի բարձրանալն ու իջնելը կապված է Խաղաղ օվկիանոսում տեղի ունեցող գործընթացների հետ: Այնպես որ, Կասպից ծովի մակարդակի բարձրացումը շարունակվելու է մինչեւ 2030 թվականը», -ասել է նա:

Զեյնալովը նշել է, որ անցյալ դարի 70-ականներից մինչ այժմ Կասպից ծովի մակարդակը 2,5 մետրով բարձրացել է եւ սրանից հետո 1,5 մետրով եւս կբարձրանա:

«Այդ բարձրացման արդյունքն է, որ 1970-80-ական թվականներին ափամերձ շրջաններում կառուցված շինությունները եւ լողափերը մնացել են ջրի տակ», -նշել է նա:

Բնապահպանը հայտնել է, որ թեեւ ջրի մակարդակի բարձրացումից Բաքուն չի տուժի, սակայն ծովի` Ադրբեջանին հարող ափերն ու Ապշերոնի թերակզու որոշ հատվածներ կհեղեղվեն ջրով:

«Ծովի ջրի բարձրացումը միաժամանակ պատճառ կդառնա նաեւ գետնաջրերի բարձրացման համար»,- համոզմունք է հայտնել ադրբեջանցի բնապահպանը: