Ռուզան Խաչատրյանի երկրորդ քայլը

Սեյրան Օհանյանի կինը երկրորդ հրապարակումն է ձոնել անհայտ պաշտոնյային, ով ոչ միայն չի ծառայել, այլև դարձել է տեղետակատվական տեռորի մասնակից Օհանյանի և նրա կնոջ դեմ: Այս ամենի մասին ծանոթանում ենք տիկին Խաչատրյանի ֆեյսբուքյան գրառումից:

Տիկին Խաչատրյանի արդեն երկրորդ հրապարակումն այս թեմայով ցույց է տալիս, որ Սեյրան Օհանյանի ու նրա կնոջ արձագանքը մեկանգամյա չէին: Այս ամենի տակ քաղաքական քայլերի շարք կա: Ինչպես կզարգանան իրադարձությունները առաջիկայում, դեռ կտեսնենք: 

Բայց տրամաբանությունը հուշում է հետևյալը: Քաղաքական վերնախավից դուրս մղված, ընդդիմության շարքերում հայտնված Օհանյանը, իշխանական մեդիաների կողմից ծաղրված Ռուզաննա Խաչատրյանն այլևս կորցնելու ոչինչ չունեն և պատրաստ են իրենց իսկ դեմ օգտագործված մեթոդներով հիմա հարվածել իշխանությանը:

Սերժ Սարգսյանը հավատարիմ է այն մոտեցմանը, որ պետք չէ մարդկանց զրկել ամեն ինչից ու նրանց դնել փակուղու առաջ: Սարգսյանը գիտի, որ ոչինչ կորցնելու չունեցող մարդը վտանգավոր է: Իսկ Օհանյանի ու նրա կնոջ թիրախում հայտնվել է ոչ թե Սարգսյանը, այլ իշխանության այն շերտը, որը հիմա իշխանական գործընթացների կենտրոնում է: 

Իշխանության այդ թևն առայժմ չի արձագանքում: Նրանք ակնարկել են զրպարտության օրենքի մասին: Սակայն տիկին Խաչատրյանն անուններ չի տալիս: Անուններ չի տալիս, բայց շարունակում է ավելացնել չափաբաժինը, ինչը նշանակում է, որ իշխանություններն ինչ-որ կերպ արձագանքելու են: Թե ինչ կերպ, դեռ կերևա: Ամեն դեպքում ներքաղաքական կյանքում հետաքրքրական ճակատ է բացվում նախկին ու ներկա իշխանությունների միջև փոխադարձ կոմպրոմատային ակնարկների տեսքով:

Սարգիս Մեսրոպյան