Ամերիաբանկը նոր մասնաճյուղ կհիմնի նոր բացվելիք մոլում

Ամերիաբանկը նոր մասնաճյուղ կհիմնի նոր բացվելիք Ռիո մոլում, ևս մեկը` հաջորդ տարվա առաջին կիսամյակում խոշոր գործատուներով կենտրոնացած տարածքում: «Արմենպրես»-ի փոխանցմամբ` այս մասին լրագրողներին տեղեկացրեց Ամերիաբանկի Մանրածախ գործառնությունների գծով տնօրեն Արման Բարսեղյանը: «Մենք երկու տարի առաջ նախաձեռնեցինք նոր ֆորմատով մասնաճյուղերի բացումը, մասնավորապես, Արշակունյաց ու Երիտասարդական մասնաճյուղերը երկու մոլերի տարածքում: Դրանք ավելի փոքր տարածքով, բայց ունիվերսալ, բոլոր տեսակի ծառայությունները մատուցող մասնաճյուղեր են, որոնց աշխատաժամանակը բավականին երկար է` մինչև 21:30-ը: Մեր սպասումները գերազանցվեցին, մասնաճյուղերը շատ արագ հավաքեցին հաճախորդների բազա ու այսօր մեր ամենաարդյունավետ մասնաճյուղերից են»,-ասաց բանկի տնօրինության անդամը: 

Նրա խոսքով` մասնաճյուղերն աշխատում են ծանրաբեռնված ռեժիմով, հետևաբար, հաճախորդների սպասարկման որակը չգցելու իրենց քայլերից մեկն էլ նմանատիպ նոր կենտրոնների բացումն է: «Առաջիկա էական քայլը Ռիո մոլում նմանատիպ մասնաճյուղի բացումն է: Նախատեսում ենք ևս մեկը հիմնել հաջորդ տարվա առաջին կիսամյակում: Տեղը դեռ ընտրված չի, որպես կանոն ընտրում ենք այնպիսի վայրեր, որտեղ կա հաճախորդերի կենտրոնացում` խոշոր գործատուների տարածքում, որոշակի կենտրոններում, որտեղ բազմում գործատուներ են գործունեություն ծավալում»,-նշեց Արման Բարսեղյանը: 

Անդրադառնալով ընթացիկ տարվա ապրիլին Գյումրիում բացված Կումայրի մասնաճյուղի գործունեությանը` Արման Բարսեղյանը նկատեց, որ այն իրենց սպասածից ավելի արագ տեմպով է զարգանում: «Մի քանի ամսվա ընթացքում մասնաճյուղի վարկային պորտֆելը հատել է 1 միլիարդի շեմը»,-եզրափակեց Ամերիաբանկի ներկայացուցիչը: