Սրտանց ցանկանում եմ, որ տարեցտարի նորանոր առիթներ ունենանք առանձնահատուկ ջերմությամբ ու հպարտությամբ խոսելու մեր մայրաքաղաքի մասին. Վ. Մկրտչյան

«Էրեբունի-Երևան 2799»-ին ընդառաջ Past.am-ը զրուցել է Նորք-Մարաշ վարչական շրջանի ղեկավար Վ. Մկրտչյանի հետ:

 -Պարոն Մկրտչյան,ի՞նչ ձեռքբերումներ ունի Նորք-Մարաշ վարչական շրջանը 2017 թվականին:

-Նորք-Մարաշ վարչական շրջանի համար 2017 թվականը կարող եմ ասել հաջող տարի էր՝ ձեռքբերումներով լի: Համաչափ զարգացման ծրագրի շրջանակում մեր վարչական շրջանում այս տարի կառուցել ենք 2 հանգստի գոտի. մեկը վարչական շրջանի ղեկավարի աշխատակազմի շենքի հարակից այգին է, մյուսը` Նորքի 2-րդ փողոցի վերջնամասում կառուցված մինի ֆուտբոլի դաշտն ու հիմնովին նորոգված հարակից տարածքը:
Շարունակվում են մեր շրջանի մարզադպրոցի նորոգման աշխատանքները: Տարվա ընթացքում պարբերական բնույթ են կրում սոցիալապես անապահով բնակիչներին տարատեսակ օգնությունների տրամադրմանն ուղղված ծրագրերը: Սերտորեն համագործակցում ենք Լեռնային Ղարաբաղի Հանրապետության Ստեփանակերտի քաղաքապետարանի հետ:
Դեռ մի շարք ծրագրեր էլ պետք է կյանքի կոչենք` ի շահ մեր համայնքի բարօրության և զարգացման, իսկ կատարված աշխատանքների գնահատականը թողնենք, որ տան բնակիչները, քանի որ հենց իրենց գոհունակությունն է մեզ համար ամենակարևորը:

-Մի քանի օրից տոնելու ենք մեր մայրաքաղաքի 2799-ամյակը,ի՞նչ կմաղթեք Երևանին և նրա բնակիչներին:

- Մեր սիրելի մայրաքաղաք Երևանը մեր հայրենիքի սիրտն է, որը դեպի իրեն է ձգում համայն հայությանը: Շնորհավորում եմ մարաշցիներին և,առհասարակ, ողջ հայությանը քաղաքամայր Երևանի հիմնադրման 2799-ամյա հոբելյանի առթիվ: Համոզված եմ, որ Երևանի հանդեպ անկեղծ սերն ու նվիրվածությունը մեր աշխատանքի հզորության գրավականն են:
Սրտանց ցանկանում եմ, որ յուրաքանչյուր հայ, աշխարհի որ ծայրում էլ լինի, տարեցտարի նորանոր առիթներ ունենա առանձնահատուկ ջերմությամբ ու հպարտությամբ խոսելու զարգացող, ծաղկող ու լուսարձակող, միշտ հին ու նոր մեր մայրաքաղաքի մասին: