Երեկվա բարեկամն այսօրվա թշնամին դառնալ չի կարող. Իրաքյան Քրդստանի կառավարության խոսնակը Իրանի և Թուրքիայի մասին

Իրաքյան Քրդստանի կառավարության խոսնակ Սեֆին Դիզային մեկնաբանել է Իրանի և Թուրքիայի կողմից հնչող՝ պատժամիջոցների կիրառման վերաբերյալ սպառնալիքներին: 

Ինչպես գրում է gazeteduvar.com.tr կայքը, Դիզային նշել է, որ Քրդստանը չի ցանկանում ռազմական բախում ունենալ Թուրքիայի կամ Իրանի հետ՝ քաջ գիտակցելով, որ երկու երկրներն ունեն տարածաշրջանի ամենահզոր զինված ուժերը: 

«Մենք գլխացավանք չենք փնտրում: Լարվածության ավելացումը ոչ մի օգուտ չի բերի», - ասել է քուրդ պաշտոնյան՝ շեշտելով, որ իրենք ռազմական բախումներ նախաձեռնելու մտադրություն չունեն և փեշմերգա քրդական ուժերի դիրքերն առաջ մղելու խնդիր չունեն:

Վերջինս նաև հայտնել է, որ իրենք հասկանում ու հարգում են հարևան երկրների մտահոգությունները՝ անվանելով Թուրքիային և Իրանին Քրդստանի հին բարեկամներ:

«Երեկվա բարեկամն այսօրվա թշնամին դառնալ չի կարող», - ասել է Դիզային:

Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:

Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու: Իրաքի իշխանությունները նաև հայտարարել են, որ բանակցություններ չեն վարելու Քրդստանի շրջանային կառավարության հետ քվեարկության արդյունքների վերաբերյալ: Հանրաքվեի անցկացման դեմ են հանդես եկել Թուրքիան և Իրանը, ինչպես նաև ԱՄՆ-ն և ՄԱԿ-ը: