Թուրքերի 78 տոկոսը համոզված է, որ սիրիացի ներգաղթյալները անվտանգության լուրջ խնդիր են ստեղծում երկրի ներսում

Թուրքիայի քաղաքացիների մեծ մասը իրենց երկրում ապաստանած սիրիացի ներգաղթյալներին դիտարկում է որպես անվտանգության սպառնալիք, շատերը նույնիսկ նշում են, որ զգուշանում են անգամ նրանցից առևտուր անել, այս մասին գրում է թուրքական diken.com.tr կայքը:

Թուրքական «Աքսոյ» ուսումնասիրությունների կենտրոնը հատուկ հարցում է իրականացրել այս առիթով, որին մասնակցել է շուրջ 1500 մարդ: Հարցվածների 78 տոկոսը խոստովանել է, որ ըստ իրենց` սիրիացի ներգաղթյալները անվտանգության լուրջ խնդիր են ստեղծում երկրի ներսում, ինչն անհանգստացնում ու վախեցնում է քաղաքացիներին:

Հարցվածների 38,7 տոկոսը կարծում է, որ սիրիացի ներգաղթյալների խնդիրը վատ ազդեցություն է թողնում երկրի տնտեսության վրա, 27 տոկոսն այդ ազդեցությունը գնահատում է ոչ թե պարզապես վատ, այլ «չափազանց վատ»: 

Հարցմանը մասնակցածների 69 տոկոսն այն կարծիքին են, որ, լինելով էժան աշխատուժ, սիրիացի ներգաղթյալները նպաստում են նաև տեղացիների շրջանում գործազրկության մակարդակի բարձրացմանը:

Հարցվածների 51 տոկոսը միանշանակ պատասխանել է, որ երբեք առևտուր չէր անի սիրիացիների կողմից բացված որևէ խանութից:

Նշենք, որ Թուրքիայում գրանցված սիրիացի ներգաղթյալների թիվը, պաշտոնական տվյալների համաձայն, արդեն անցել է 3 մլն-ից: Միայն Ստամբուլում գտնվում է ավելի քան կես մլն սիրիացի ներգաղթյալ։

Ընդհանուր առմամբ, 2016 թվականին Թուրքիան ընդունել է 2 մլն 900 հազ. փախստական՝ դառնալով 2016թ.-ին ամենաշատ ներգաղթյալ ընդունած երկիրը: