Արենիում պայքարը թեժ է լինելու

Վայոց ձորի մարզում ևս նոյեմբերի 5–ին կկայանան խոշորացված համայնքների ղեկավարների ընտրություն: Այստեղ ձևավորվել են երեք խոշորացված միավոր՝ Արենի, Գլաձոր, Եղեգիս։

Արենի համայնքին միավորվել են ինը գյուղեր:

«Փաստ»–ի տեղեկություններով՝ Արենիի ղեկավարի պաշտոնին հավակնում են՝ Ռինդ համայնքի ՀՀԿ–ական ղեկավար Հուսիկ Սահակյանը, Արփի համայնքի ղեկավար Ռազմիկ Վարդանյանն ու Արենիի ղեկավար՝ Րաֆֆի Խաչատրյանը։

Տեղի բնակիչները դեռ վաղ են համարում ընտրությունների մասին խոսելը: Առայժմ նրանք մի բանից են բողոքում՝ չեն ուզում միավորվել հարևան համայնքների հետ:
«Ավելի լավ է էս միավորումը հանեն, ամեն մի գյուղապետ թող իրա գյուղում աշխատի, մեկ է խոշորացումը մեզ բան չի տալու: Ես բարեկամ ունեմ Իջևանում, իրենց գյուղն էլ է միավորված: Ասում է՝ խոշորացումը ձևական բան է, դրանից օգուտ չկա»,– պատմեց Արենի գյուղի բնակիչը:

Տեղեկացնենք, որ Ռինդ համայնքի ղեկավար Հուսիկ Սահակյանը 2007 թվականին է ստանձնել գյուղապետի պաշտոնը և երկու անգամ՝ 2010 և 2014 թվականներին վերընտրվել:

Արփի և Արենի համայնքների ղեկավարները անցյալ տարի են ընտրվել: Տեղացիների փոխանցմամբ՝ թեժ ընտրապայքար է ընթանալու: Ի դեպ, համայնքներում մարդիկ խոսում են, որ առաջիկա ընտրություններին գումարներ կարող են բաժանվել:
Համայնքների խոշորացման ծրագրով պայմանավորված՝ այս տարվա նոյեմբերի 5–ին հանրապետության 34 համայնքներում կայանալու են տեղական ինքնակառավարման մարմինների ընտրություններ:

Առաջադրումները կսկսվեն հոկտեմբերի 1–ից, իսկ հոկտեմբերի 6–ին դիմումների ներկայացման վերջնաժամկետն է։