Հայաստան-Սփյուռք. փող ճարելու տե՞ղ, թե՞ Սերժ Սարգսյանի PR

Այսօր Երևանում մեկնարկել է Հայաստան-Սփյուռք համաժողովը: Հայաստանի, Արցախի, Սփյուռքի մի շարք քաղաքական, հասարակական և հոգևոր գործիչներ ելույթ են ունեցել, շատերն ունենալու են մոտ օրերս: Սերժ Սարգսյանի բացման ելույթում հնչեցին 4 միլիոնանոց ազգ դառնալու մասին մտքեր: Սա տրամաբանական շարունակությունն է այն քարոզչական թեզի, որ առաջ էին տանում հանրապետականները նախքան համաժողովը ՝ հող նախապատրաստելով Սարգսյանի ելույթի համար:

Հայաստան-Սփյուռք հարաբերությունները բավական բազմաշերտ են ու մեկ համաժողովով դրանք դժվար թե լուծվեն, մանավանդ երբ համաժողովի գործառույթն առավելապես սիմվոլիկ է: Փոխվել է սփյուռքի պատկերը, տրանսֆորմացվել է նաև Հայաստանը: Միմյանց հանդեպ ընկալումներում բազմաթիվ խզումներ ու անվստահություն կա: 

Սփյուռքը Հայաստանում շարունակում է  ընկալվել որպես «փողի մեշոկ», իսկ Հայաստանը սփյուռքում ՝ որպես սրբազան հայրենիք, բայց ոչ երբեք պետություն: Միաժամանակ Սփյուռքում իր ազդեցությունն է կորցրել Դաշնակցությունը, որ ավանդաբար վստահության կամուրջ էր հանդիսանում Սփյուռք-Հայաստան հարաբերություններում: 

Սփյուռքի հետ հարաբերությունները լարված սկսեց նաև Սերժ Սարգսյանը ՝ 2008-ին նախաձեռնելով հայ-թուրքական բանակցություններ: Սակայն հիմա, երբ Թուրքիայի հետ հարաբերությունների կարգավորման հեռանկարը մշուշոտ է, իսկ տնտեսական, ժողովրդագրական իրավիճակը վատթար, Սարգսյանը վերստին փորձում է ռեաբիլիտացնել Սփյուռքի ռեսուրսը իր համար: 

Արտակ Ասլանյան