Բյուրականի հրդեհը մարված է

ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Բյուրականի մոտ առկա ծխացող օջախների հետմարման աշխատանքները սեպտեմբերի 9-ին, ժամը 20.00-ի սահմաններում ավարտվել են: Հրդեհն ամբողջությամբ մարված է: Այս մասին «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից՝ հավելելով. «Այսօրվա աշխատանքներում ներգրավվել է 125 փրկարար ծառայող և 20 միավոր տեխնիկա:

Սեպտեմբերի 3-ին բռնկված հրդեհի հետևանքով այրվել է մոտ 100 հա խոտածածկ տարածք: Հրդեհը տարածվում էր վերգետնյա ուղիներով: Հրդեհաշիջման աշխատանքները կազմակերպվել են անընդհատ ռեժիմով՝ հատուկ լուսավորություն ապահովելու շնորհիվ շարունակվելով նաև գիշերը:

Բոլոր անհրաժեշտ միջոցները ձեռնարկվել են կրակը տեղայնացնելու և դեպի բնակավայրեր տարածումը կանխելու համար: Կիրառվել են հրդեհաշիջման տարբեր եղանակներ (ուղղաթիռով իրականացվել է ջրթափման գործողություն, հրշեջ-մեքենաներ, դյուրակիր ջրատարներ և տարբեր պարզունակ գործիքներ), անօդաչու թռչող սարքով և ՀՀ ՊՆ ուղղաթիռով բազմաթիվ անգամներ իրականացվել է օդային հետախուզություն՝ դժվարմատչելի վայրերում կրակի ու ծխացող օջախները հայտնաբերելու և հրդեհաշիջման համապատասխան մարտավարություն ընտրելու համար, որի շնորհիվ անտառապատ տարածքը գրեթե ամբողջությամբ պահպանվել է:

Այսօր երեկոյան Արագածոտնի մարզում գործող հրդեհաշիջման շտաբում անցկացվել է ամփոփիչ խորհրդակցություն՝ ՀՀ ԱԻՆ փրկարար ծառայության, «Հայանտառ» ՊՈԱԿ-ի ներկայացուցիչների և հարակից համայնքների ղեկավարների մասնակցությամբ, որտեղ զեկուցվել է հրդեհաշիջման աշխատանքների ավարտի մասին:

ՓԾ տնօրեն, փ/ծ գնդապետ Մ. Ղազարյանն իր խոսքում, ԱԻ նախարարության անունից, շնորհակալություն է հայտնել հրդեհաշիջման աշխատանքներում ընդգրկված հրշեջ-փրկարարներին, ինչպես նաև «Հայանտառ» ՊՈԱԿ-ի աշխատակիցներին ու քաղաքացիներին, որոնք աջակցել են հրդեհի մարման աշխատանքներին:

«Արագածոտնի անտառտնտեսություն» մասնաճյուղի տնօրեն Վ.Աբրահամյանը նույնպես շնորհակալություն է հայտնել հրշեջ-փրկարարներին՝ հայրենանվեր ծառայություն իրականացնելու համար:

Քանի որ առաջիկա օրերին հանրապետությունում կանխատեսվել է բարձր կարգի հրդեհավտանգ իրավիճակ՝ ՓԾ Արագածոտնի մարզային փրկարարական վարչության ուժերով տեղում սահմանվել է հերթապահություն»: