Մանե Թանդիլյան. «Ծառուկյան»–«Ելք» դաշինքների համագործակցությունը զարգանալու բավական մեծ տեղ ունի». «Փաստ»

«Փաստ» օրաթերթը գրում է.

«Փաստը» զրուցել է Ազգային Ժողովի «Ելք» խմբակցության անդամ, պատգամավոր Մանե Թանդիլյանի հետ

– Տիկին Թանդիլյան, արդեն մի քանի ամիս է, ինչ «Ելք» խմբակցության անդամներն աշխատում են խորհրդարանում: Հետադարձ հայացք գցելով անցած ամիսներին՝ կարո՞ղ եք փաստել, որ այդ կառույցում Ձեզ հաջողվում է աշխատել իշխանական և իրենց ընդդիմադիր կոչած այլ քաղաքական ուժերի կողքին:

– Նորընտիր Ազգային ժողովը իր աշխատանքները սկսելուց կարճ ժամանակ անց մեկնեց արձակուրդի: Այնուհանդերձ, մենք այդ կարճ ժամանակահատվածում հասցրեցինք ակտիվորեն ներգրավվել խորհրդարանի աշխատանքներին: Մենք ի սկզբանե հայտարարել ենք, որ Ազգային ժողովում մեր աշխատանքները բխելու են Հայաստանի ժողովրդի շահերը պաշտպանելու առաջնահերթությունից: Եթե լինեն այնպիսի հարցեր, որոնք կբխեն ժողովրդի և մեր պետության շահերից, ապա մենք կարող ենք քննարկել այդ հարցերի շրջանակներում տարբեր քաղաքական ուժերի հետ համագործակցության հարցը:

– Այնուամենայնիվ, այս մի քանի ամիսների ընթացքում դուք, օրինակ՝ «Ծառուկյան» դաշինքի կողմից աջակցություն կամ համագործակցության գնալու փորձեր ու քայլեր տեսե՞լ եք:

– Ես տեսել եմ որոշ հարցերում համագործակցության պատրաստակամություն՝ ելույթների մակարդակում: Սակայն իրական գործողությունների մեջ կարծում եմ, որ նման համագործակցությունը զարգանալու բավական մեծ տեղ ունի:

– Ձեր դաշինքը Ազգային ժողովում պատգամավորներ ունենալուց հետո իր նախընտրական ծրագրի որքա՞ն կետերն է բարձրաձայնել ու իրականացրել և առաջիկա աշնանային նստաշրջանում ի՞նչ նախաձեռնություններ ունեք, որ պատրաստվում եք կյանքի կոչել:

– Արդեն նշեցի, որ ԱԺ աշխատանքների մեկնարկից շատ կարճ ժամանակ անց խորհրդարանը գնաց արձակուրդի, սակայն այդ ժամանակամիջոցում մենք ակտիվորեն ներկայացրեցինք մեր տեսակետներն ու առաջարկները մի շարք հարցերի շուրջ: Աշնանային նստաշրջանից սկսած՝ մենք առավել համապարփակ կերպով կներկայացնենք մեր առաջարկները՝ թե՛ օրենսդրական նախաձեռնությունների և թե՛ ԱԺ կանոնակարգով սահմանված մյուս գործիքակազմերով:

– Նկատել ենք, որ վերջին շրջանում շատ են Ձեզնից (դաշինքից) հիասթափվելու վերաբերյալ ֆեյսբուքյան արձագանքները: Ինչի՞ հետ եք դա կապում և արդյոք համարո՞ւմ եք, որ չեք իրագործել ընտրողների սպասումները:

– Նախ, ընտրողների սպասումները իրագործելու համար հարկավոր է ողջամիտ ժամանակ, և սխալ կլինի մի քանի ամսվա ոչ այնքան ինտենսիվ ԱԺ աշխատանքների պայմաններում նման դատողություններ կատարել: Ֆեյսբուքյան արձագանքները և քննարկումները տարբեր միջավայրերում, վկայում են այն մասին, որ քաղաքացիները մեծ ակնկալիքներ ունեն «ԵԼՔ» դաշինքից և հույս են կապում մեզ հետ: Սա մեզ պարտավորեցնում է կրկնակի եռանդով աշխատել և արդարացնել մարդկանց սպասումները:

– Գտնո՞ւմ եք, որ սա կարող է հակառակ դաշտի գործը լինել:

– Անկախ այն բանից, թե տարբեր դաշտերում ովքեր ինչ միջոցների են դիմում «Ելք» դաշինքի գործունեությունը այս կամ այն կերպ մեկնաբանելու կամ խեղաթյուրելու համար, մենք շարժվում ենք սեփական օրակարգով՝ հավատարիմ մնալով մեր նախընտրական ծրագրին և ժողովրդին տված խոստումներին: Գուցե ոմանց դա այնքան էլ դուր չի գալիս, սակայն մենք բավականաչափ նպատակասլաց ենք և կարողանում ենք առաջնայինը տարբերել երկրորդականից և ընթանալ դեպի մեր հիմնական նպատակները:

 

Շարունակությունը՝ «Փաստ» օրաթերթի այսօրվա համարում