«Դերերի ընտրության հարցում շատ բծախնդիր եմ». դերասան Սիսիան Սեփանյանը՝ «Կինոյի մասին» խորագրում

NEWS.am STYLE-ը գրում է.

Երիտասարդ դերասան Սիսիան Սեփանյանը, որին հայ հեռուստադիտողը բացահայտեց «Օտարը» հեռուստասերիալի շնորհիվ, շատ հաճախ է դիտում ֆիլմեր: «Կինոյի մասին» խորագրի շրջանակում Սիսիանը NEWS.am STYLE-ին պատմել է իր սիրած ժանրերի, դերասանների եւ նախընտրած ֆիլմերի մասին.

«Առհասարակ շատ եմ նայում ֆիլմեր։ Դա այն սիրելի զբաղմունքներից է, որն ինձ երբեք չի ձանձրացնում։ Ամենասիրելի ու նախընտրելի ժանրը դրաման է ինձ համար, սիրում եմ նաեւ թրիլերներ, երբեմն դիտում եմ նաեւ մելոդրամաներ»,- ասում է դերասանը՝ խոստովանելով.

«Իհարկե, շատ ֆիլմեր կան, որոնք դիտելիս միշտ «նախանձով» եմ հետեւել տվյալ դերասանի խաղին։ Այս զգացումն ամենաշատը ունեցել եմ «Դաշնակահարի լեգենդը»/«Legend of 1900» ֆիլմում Թիմ Ռոթի մարմնավորած կերպարի նկատմամբ»։

Սիսիանի հետ զրուցեցինք նաեւ սիրելի ռեժիսորների եւ դերասանների մասին.

«Կուզեի աշխատել Դեւիդ Ֆինչերի հետ, քանի որ իմ ամենասիրելի ռեժիսորն է։ Իսկ մյուս ամենասիրելի ռեժիսորները, որոնց հետ ես սիրով կցանկայի աշխատել Տարանտինոն եւ Գոնսալես Ինյարիտուն են՝ հանճարները:  Ինչ վերաբերում է սիրածս դերասաններին՝ աննկարագրելի հաճույք եմ ստանում Էդվարդ Նորթոնի խաղը դիտելիս՝ փառահեղ դերասան է, իսկական արտիստ։ Սիրում եմ նաեւ Լեոնարդո Դի Կապրիոյի,  Ջուդ Լոուի եւ Մեթյու ՄքՔոնահիի խաղը՝ գրեթե բոլոր կերպարներում»։

Սիսիանն այն դերասաններից է, որը պատրաստ է մարմնավորել ցանկացած կերպարի.

«Առանձնացնել հնարավոր չէ, քանի որ դերասանի համար չկա կերպար, որ հաճելի չլինի կերտել։ Դերերի ընտրության հարցում շատ բծախնդիր եմ եւ մանրամասնորեն եմ ուսումնասիրում առաջարկված կերպարը, բայց չեմ կարծում, թե կա այնպիսի դեր, որը կտրուկ ձեւով կբացառեմ»,-ասում է նա:

Դերասանին խնդրեցինք նաեւ նշել իր ամենասիրելի 5 ֆիլմերի անունները.

«Բնականաբար, անհնար է առանձնացնել սիրելի ֆիլմերի հնգյակ, քանի որ ցանկացած ֆիլմ էլ իր հերթին լավն է, եթե միտք ու էմոցիա է փոխանցում։ Բայց, ամեն դեպքում, եթե փորձեմ դրանցից լավագույնները նշել՝ «21 գրամ»/«21 Grams», «Դաշնակահարի լեգենդը»/ «Legend of 1900», «The Lobster», «Կնքահայրը»/«The Godfather», «Եղնիկների որսորդը»/«The deer hunter» ։ Հենց սրանք եկան մտքիս, որովհետեւ ամենաազդեցիկ եւ դիպուկ ֆիլմերն են եղել, ամեն մեկը ինչ-որ մի էտապում կարողացել է աննկարագրելի ազդեցություն թողնել»:

Սյունե Առաքելյան 

Լուսանկարները՝ Սիսիանի Facebook-ի էջից