Ի՞նչ հանգամանքներում է մահացել ազատամարտիկը 3 տարի առաջ. կրկնակի փորձաքննություն նշանակվեց

Երեւանի Նոր Նորք վարչական շրջանում 2014թ. ամռանը ծեծի ենթարկվելու հետեւանքով մահացած ազատամարտիկ Վարդան Թումանյանի գործով վերջապես նշանակվեց դատաբժշկական հանձնաժողովային փորձաքննություն:

Ավան եւ Նոր Նորք վարչական շրջանների ընդհանուր իրավասության դատարանում տուժող կողմն է միջնորդել նշանակել դիակի կրկնակի դատաբժշկական փորձաքննություն: Դատավոր Դավիթ Հարությունյանը բավարարել է միջնորդությունն ու նշանակել փորձաքննություն: Նշենք, որ Վարդան Թումանյանի մահվան վերաբերյալ երկու հակասական եզրակացություն կա. առաջինի համաձայն՝ նրա մահը վրա է հասել ծեծի հետեւանքով, երկրորդի համաձայն՝ նա այդ օրը մահանալու էր անկախ ամեն ինչից:

Կրկնակի փորձաքննությունը պարզելու է հետեւյալ հարցերը՝ ո՞րն է եղել Վ.Թումանյանի մահվան պատճառը, 13.07.2014թ. ստացված մարմնական վնասվածքների և մահվան միջև առկա՞ է պատճառահետևանքային կապ, թե՞ ոչ, առողջապահության նախարարի հրամանով կազմված փորձագիտական հանձնաժողովի Դատաբժշկական լրացուցիչ հանձնաժողովային եզրակացությունը Վ.Թումանյանի մահվան պատճառի մասով հիմնավորվա՞ծ և արժանահավատ է, թե՞ ոչ եւ այլն:

Ինչպես ավելի վաղ հաղորդել էր NEWS.am-ը, սպանված ազատամարտիկի հարազատների խոսքով՝ 2014թ. հուլիսի 13-ին հարեւանների՝ Վարդան Թումանյանի եւ Բաբկեն Սարգսյանի միջեւ վիճաբանություն էր առաջացել նարդի խաղի ժամանակ, ավելի ուշ Բաբկեն Սարգսյանի հարազատները՝ Գեւորգ Սարգսյանն ու Սարգիս Ղուկասյանը, եկել էին Վարդան Թումանյանի հետ «զրուցելու», տնից դուրս հրավիրել ու դաժան ծեծի ենթարկել դստեր եւ կնոջ ներկայությամբ։ Մի քանի օր անց Վարդան Թումանյանը հիվանդանոցում մահացել էր։

Երեք տղամարդկանց մեղադրանք է առաջադրված Քրեական օրենսգրքի 113-րդ հոդվածի 2-րդ մասի 3-րդ կետով՝ դիտավորությամբ մեկ ուրիշին մարմնական վնասվածք կամ առողջությանը որեւէ այլ վնաս պատճառելը, որը վտանգավոր չէ կյանքի համար, բայց առաջացրել է առողջության տեւական քայքայում կամ ընդհանուր աշխատունակության մեկ երրորդից պակաս զգալի կայուն կորուստ: