Երկրապահներին դիմավորում է նախագահը, Կարապետյանին ՝ վարչապետը. երկու տարբեր այցերի հետքերով

ԵԿՄ-ն իր ղեկավար Մանվել Գրիգորյանի գլխավորությամբ այժմ Արցախում է և մի շարք միջոցառումներ է կազմակերպում: Մի կողմ թողնենք միջոցառումների էմոցիոնալ կողմն ու դրանց պաթետիկ մեկնաբանությունը որոշ լրատվամիջոցների կողմից: Առավել ուշագրավ է, որ Մանվել Գրիգորյանին դիմավորում, ուղեկցում է նախագահ Բակո Սահակյանը ու նրա հետ միասին արցախյան վերնախավը: Ուշագրավ է այդ փաստը հատկապես, երբ օրեր առաջ Արցախում Կարեն Կարապետյանին որոշ դրվագներով ուղեկցում էր ընդամենը վարչապետը: 

Երկու այցերն էլ պաշտոնական չեն: Մի դեպքում արձակուրդ, մյուս դեպքում ՝ ռազմահայրենասիրական միջոցառումներ: Երկու դեպքում էլ այցերի մոտիվացիաները սիմվոլիկ են: Կարապետյանը փորձում էր յուրային դառնալ ամենակարճ ճանապարհով: Մանվել Գրիգորյանն ու երկրապահներն էլ, պարզապես ծիսակարգի համաձայն անում են այն, ինչ սովորաբար անում են երկրապահները: 

Մանվել Գրիգորյանն ու ԵԿՄ-ն համարվում են Սերժ Սարգսյանի ռեսուրսը: 2008-ից հետոյի փոփոխությունները ստեղծեցին մի իրավիճակ, երբ Գրիգորյանն ու իր ղեկավարած կառույցը դարձան Սարգսյանի հովանավորյալները: Լինելով բավական մեծ ու ցանցային կառույց, երկրապահներն ըստ էության բանակի առաջին թիկունքն են: Միաժամանակ ահռելի ռեսուրս ներքաղաքական հարցերում, երբ քաղաքական ու սոցիալական դժգոհությունների կենտրոնում անընդհատ հայտնվում են ազատամարտիկներ:

Իսկ Կարեն Կարապետյանին, կարծես թե, այդքան էլ որպես յուրային չեն ընդունել: Մանվել Գրիգորյանն, ով քաղաքական իմաստով ավելի ցածր կշիռ ունի, ավելի ջերմորեն է ընդունվում ու ուղեկցվում:

Սարգիս Մեսրոպյան