Տեղի է ունեցել Մալաթիա-Սեբաստիա և Շենգավիթ վարչական շրջանների զորացրվածների դիմավորման արարողությունը

 Երևանի քաղաքապետի տեղակալ Դավիթ Օհանյանը ներկա է գտնվել Մալաթիա-Սեբաստիա և Շենգավիթ վարչական շրջանների զորացրվածների դիմավորման արդեն ավանդական դարձած խորհրդանշական միջոցառմանը:

Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, ողջունելով 2016 թ. ապրիլին առաջնագծում ռազմական գործողություններին մասնակցած և արդեն զորացրված զինծառայողներին՝ քաղաքապետի տեղակալ Դավիթ Օհանյանը նշել է, որ դիմավորման միջոցառումը Երևանի քաղաքապետարանի կողմից իրականացվող՝ բանակ-հասարակություն կապի ամրապնդմանն ուղղված ծրագրերից մեկն է: Քաղաքապետի տեղակալը հիշեցրել է նաև, որ արդեն 5-րդ տարին անընդմեջ Երևանի քաղաքապետ Տարոն Մարգարյանի նախաձեռնությամբ կազմակերպվում են երևանաբնակ զինծառայողների ծնողների այցելություններ սահմանամերձ զորամասեր՝ տեսակցելու իրենց որդիներին, ինչը լինելու է շարունակական:

«Շահումյան» տարածքի զինվորական կոմիսարիատում տեղի ունեցած միջոցառմանը ներկա են եղել նաև Մալաթիա-Սեբաստիա վարչական շրջանի ղեկավար Արտակ Ալեքսանյանը, տարածքի զինվորական կոմիսար գնդապետ Ռոմիկ Մարգարյանը, զինվորականներ, պաշտոնյաներ, ծնողներ և հարազատներ: Միջոցառման ժամանակ 2016 թ. ապրիլյան քառօրյային մասնակցած զինծառայողների պատվին բացվել է «Մեր ժամանակի հերոսը» խորագրով փառքի պատ:

ՀՀ ԶՈւ հզորացմանն ու զորահավաքային պատրաստականության ամրապնդմանն աջակցելու և մշտապես զինկոմիսարիատների կողքին լինելու համար Երևանի քաղաքապետի տեղակալ Դավիթ Օհանյանը, Մալաթիա-Սեբաստիա վարչական շրջանի ղեկավար Արտակ Ալեքսանյանը և «Երևանի ավտոբուս» ՓԲԸ տնօրեն Էլբակ Թարփոշյանը ՀՀ զինվորական կոմիսար, գեներալ-մայոր Հենրիկ Մուրադյանի անունից արժանացել են շնորհակալագրերի: