Նկարահանման ընթացքում աստվածային երևույթի հանդիպեցինք. Արսեն Լևոնյան

ԼԱՅՖ 22 Հոկտեմբեր, 2015 15:59

Խորեն եւ Արսեն Լեւոնյան եղբայրները վերջերս նկարահանվել են երիտասարդ ռեժիսոր Ասպետ Շերմազանյանի «Աղ ու հաց» կոչվող ֆիլմում, որի հիմքում աստվածաշնչյան «Անառակ որդու վերադարձը» առակն է: Life.panorama.am-ը զրուցել է Արսեն Լեւոնյանի հետ եւ որոշակի մանրամասներ պարզել.

«Այս ֆիլմը Ռուսաստանից եկած Ասպետ Շերմազանյանի կուրսային աշխատանքի համար է նկարահանվել: Ես եւ Խորենը հրավերները ստացել ենք առանձին-առանձին, իհարկե, հետո մեր դերերի վերաբերյալ միասին եղբայրական քննարկումներ արել ենք: Պետք է նաեւ նշեմ, որ շատ լավ անձնակազմ էր հավաքված, նկարահանման երեք օրերն էլ շատ բուռն ու հետաքրքիր անցան,- նշեց նա ու հավելեց,- քանի որ ըստ առակի երկու եղբայրներից մեկը հեռանում է հայրական տնից՝ օտար ճանապարհներին, բայց հետո հասկանում է սխալը, զղջում ու վերադառնում: Ես եղբայրներից հենց նրան էի մարմնավորում՝ անառակ որդին ես էի»:

Արսեն Լեւոնյանը մեզ հետ զրույցում պատմեց, որ Լոռիում անցկացվող նկարահանումների ժամանակ մի շատ հետաքրքիր երեւույթի են ականատես եղել.

«Նկարահանումների ընթացքում մի աստվածային երեւույթի հանդիպեցինք. այն վայրում, որտեղ նկարահանվում էինք, սարի վրա անբացատրելի ծիածան տեսանք: Երբ քաղաքում ենք ծիածան տեսնում, եզրերը չեն երեւում, իսկ այստեղ շատ պարզ նշմարվում էին հսկա ծիածանի եզրերը՝ իսկապես հրաշալի տեսարան էր»:

Ի դեպ, ֆիլմի տեւողությունը կլինի մոտավորապես 40 րոպե, այն կցուցադրվի նաեւ Հայաստանում, բացի այդ, կներկայացվի աշխարհի լավագույն կինոփառատոններում:

Հեղինակ՝ Անուշիկ Մելքոնյան