Հայաստանում կառուցվող աշխարհի ամենաերկար զիփլայնի բացումը հետաձգվում է (ֆոտոռեպորտաժ)

Հայաստանում կառուցվող աշխարհի ամենաերկար զիփլայնի բացումը հետաձգվում է մինչեւ հաջորդ տարի։ Այս մասին լրագրողների հետ զրույցի ժամանակ հայտնել է Yell Extreme Park նախագծի համահեղինակ Տիգրան Չիբուխչյանը։ Մամուլի ասուլիսն անցել է խորհրդանշական վայրում՝ աշխարհի ապագա ամենաերկար զիփլայնի տեխնիկական ճոպանի համար աշտարակի մոտ։ Նշենք, որ օգոստոսի 19-ին Yell Extreme Park-ը նշում էր իր ծննդյան երկրորդ տարեդարձը  (ֆոտոռեպորտաժ)։

Տիգրան Չիբուխչյանը նշեց, որ ի սկզբանե ծրագրվում էր կառուցել 2680 մ երկարության զիփլայն։ Հիմա ծրագրերը փոխվել են, ու զիփլայնի երկարությունը 2770 մետրի կհասնի։ Բացի այդ՝ նոր զիփլայնի մեկնակետը մոտ 400 մետրով հեռու ու 50 մետրով ներքեւ է գտնվելու պարկի հիմնական տարածքից ու հարց է առաջանում, թե ինչպես են այցելուները այտեղ հասնելու։ Այս հարցը մտադիր են լուծել յուրօրինակ ձեւով։ Այցելուների «տեղափոխության» միջոցներից մեկը կարող է լինել զորբը  (թափանցիկ գնդի մեջ իջնելը)»,- նշեց Չիբուխչյանը։ Զիփլայնի բացումը հետաձգելու հարցում հիմնական խնդիրը վայրի ընտրությունն է։

«Մենք երկրում զիփլայնի շուկա ենք ստեղծել։ Հիմա այն կա ոչ միայն Ենոքավանում, այլեւ, այլ ընկերությունների ջանքերով, Ծաղկաձորում, Պարզ լճում։ Մենք միայն ուրախ ենք դրա համար։ Պարզվեց, որ հայերը սիրում են էքստրիմ։ Այդ հարցում կա մեր ավանդը։ Ու ես անկեղծորեն ուրախ եմ, որ մյուսներն էլ են միացել այդ գործընթացին»,- ասաց Տիգրան Չիբոըխչյանը։