Ճապոնիան կառուցել է օվկիանոսի հոսանքից էներգիա արտադրող էլեկտրակայան

Ճապոնիայում հաջողությամբ իրականացվել է նորագույն շարժական էլեկտրակայանի առաջին խոշոր փորձարկումը, որը էներգիա է արտադրում օվկիանոսի հոսանքից։ Աշխատանքները շարունակվել են մոտ հինգ օր՝ Կուտինոսիմա կղզու մոտ ուժեղ օվկիանոսային հոսանքի գործողության շրջանում, հայտնում է NHK հեռուստաալիքը։

Էլեկտրակայանն  իրենից ներկայացնում է մոտ 20 մետր երկարության երեք միացված ցիլինդրներ։ Դրանցից երկուսում կան մոտ 11 մետր տրամագծով գեներատորներ։ Միջին ցիլինդրը յուրատեսակ լողան է, իսկ մյուս երկուսը արտադրում են էլեկտրաէներգիա, որը մալուխներով ափ է մատակարարվում։ Սարքի հզորությունը 100 կՎՏ է։ Համակարգը, որը մշակողներն անվանել են «Կայրյու»,  նոր էներգետիկայի ու արդյունաբերական տեխնոլոգիաների զարգացման կազմակերպության եւ IHI Corporation-ի մշակումն է։

Էլեկտրակայանը փորձարկումներ է անցել 20-50 մ խորության վրա, հասնելով մոտ 30 կՎտ արտադրման առավելագույն նիշին։ Գիտնականների խոսքով՝ իրենք կշարունակեն աշխատանքները այդ հատվածում, քանի որ այստեղ հոսանքը կայուն է ու ինտենսիվ։ Ըստ մշակողների՝ սրանք էլեկտրաէներգետիկայի այս ոլորտում առաջին հաջող փորձարկումներն են։ Նրանք համոզված են, որ օվկիանոսի հոսանքների էներգիայի գործածումը շատ ավելի շահեկան է, քան արեւային էլեկտրակայանները։Կոմերցիոն նախագծերը կարող են գործարկվել արդեն 2020-ից։