Շարմազանովի ակնարկը ԵԼՔ-ին

Երեկ, ՀՀԿ գործադիր նիստից հետո տված մամլո ասուլիսում ՀՀԿ խոսնակ Էդուարդ Շարմազանովը նշել է, որ ԵԼՔ-ի ոչ բոլոր անդամներն են կողմ ԵԱՏՄ-ից դուրս գալուն: Դատելով վերջին շրջանում ԵԼՔ-ի խուսափողական վարքագծից, այս հարցին նրանք դժվար թե անդրադառնան: Ընդհանրապես ԵԱՏՄ-ի մասին Մարուքյանի սկսած, այնուհետ Արամ Սարգսյանի կողմից հավանության արժանացած, հետո մեղմացված նախաձեռնությունը պատուհաս դարձավ ԵԼՔ-ի համար: Նրանք ամեն գնով խուսափում են դրա մասին հարցուպատասխանից: Ավելին, զուգահեռ, այլ՝ ավելի մեղմ երանգներով ու սիմվոլիկ էությամբ հակառուսական օրակարգ են մեջտեղ բերել ՝ ԵԱՏՄ-ի թեման մոռացնելու համար: Բացի այդ էլ, երբ հնչում են հարցադրումներ, ԵԼՔ-ից պատասխանում են, թե իշխանությունը ցանկանում է պառակտել ԵԼՔ-ը:

Շարմազանովն առաջին հանրապետականը չէ, ով ֆիքսում է ԵԼՔ-ում տիրող անորոշությունը: Մինչ այդ, ԱԺ արտահերթ նիստերից մեկի ժամանակ Փաշինյանի հետ ունեցած լեզվակռվի ժամանակ ԵԼՔ-ի միասնականությունը կասկածի տակ էր դրել ՀՀԿ խմբակցության ղեկավար Վահրամ Բաղդասարյանը: Արդյո՞ք սա նշանակում է, որ ՀՀԿ-ն ցանկանում է պառակտել ԵԼՔ-ը: Ավելի շուտ նրանց խոսքերում ոչ թե դավադրություն, այլ՝ իրավիճակի ճիշտ գնահատական կարելի է գտնել; Մանավանդ ԵԼՔ-ի ներկայի անորոշակի կամ անորոշ լռության ֆոնին:

Իսկ այդ մտայնությունները, տհաճ հարցադրումներն ու մեղադրանքները կարելի է ցրել մեկ ձևով: Աանցքային անդամները կամ դաշինքի մաս կազմող կուսակցությունները հերթով հստակ դիրքորոշում հայտնեն՝ դեմ են ԵԱՏՄ-ին, թե՝ կողմ, դեմ են դուրս գալուն, թե՝ կողմ:

Իսկ քանի դեռ սա չի արվում, ուրեմն նման հարցադրումներն անընդհատ են լինելու: Ի վերջո, պարզ է՝ ԵԱՏՄ-ի հարցում հիմնական արգելակը Փաշինյանն է: Բայց նա չի ուզում ուղիղ պատասխանել այդ հարցին, որովհետև լինելով ամբոխահաճո գործիչ լավ գիտի, որ այդ դեպքում արևմտամետ հակումներ ունեցող հատվածի թիրախն է դառնալու ու կորցնելու է նրանց համակրանքը: 

Արտակ Ասլանյան