Օդային հրդեհաշիջման երրորդ թռիչքը կիրականացվի տեղանքի հետախուզումից հետո

 Խոսրովի արգելանոցում բռնկված անտառային հրդեհի դեմ պայքարի շրջանակներում ՌԴ ԱԻՆ «ԻԼ-76» ինքնաթիռի 2-րդ թռիչքից հետո կիրականացվի տեղանքի օդային հետախուզություն, ինչից հետո կրկին կորոշվեն թիրախային օջախները և կիրականացվի օդային հրդեհաշիջման 3-րդ թռիչք: Ինչպես տեղեկացնում է «Արմենպրես»-ը, այս մասին ֆեյսբուքյան իր էջում գրել է ՀՀ ԱԻՆ մամուլի քարտուղար Նանա Գնդոյանը:

ԱԻՆ լրատվական ծառայությունն էլ հաղորդում է, որ այս պահին ՀՀ և ՌԴ ԱԻ նախարարության մասնագետներից կազմված խումբն ուղղաթիռով հետախուզական թռիչք է իրականացնում Խոսրովի պետական արգելանոցի տարածքում՝ գնահատելու համար առաջին 2 հրդեհաշիջող թռիչքների արդյունքը և որոշելու համար ջրալցման հաջորդ թիրախները:  «ԻԼ-76» ինքնաթիռը Երևանի «Էրեբունի» օդանավակայանում ջրատարների օգնությամբ լիցքավորվում է՝ պատրաստվելով 3-րդ թռիչքին:

Երևանի «Էրեբունի» օդանավակայանում ջրատարների օգնությամբ վերալիցքավորվելուց հետո ՌԴ ԱԻ նախարարության հրդեհաշիջման «ԻԼ-76» ինքնաթիռը քիչ առաջ 2-րդ անգամ ուղևորվեց Խոսրովի արգելանոցում բռնկված հրդեհի վայր: 

Օգոստոսի 15-ին վաղ առավոտյան ՀՀ ԱԻ նախարար Դավիթ Տոնոյանը ռուս փրկարար գործընկերների հետ ուղղաթիռով իրականացրել է հետախուզական թռիչք, որի ընթացքում որոշվել են ջրալցման վայրերը: Ռուսական «ԻԼ-76»-ը ժամը 08:50-ին իրականացնում էր առաջին թռիչքը: Նախնական պլանավորվում է 2 թռիչք և 2 ջրալցում:

«Խոսրովի անտառ» արգելոցում բռնկված հրդեհը մարելու համար օգոստոսի 14-ի ժամը 17:00-ի դրությամբ 63  փրկարար, ՀՀ ՊՆ 124 զինծառայող. 19 բնապահպան,  անտառտնտեսության 40 աշխատակից իրականացնում են հրդեհաշիջման աշխատանքներ:  

Օգոստոսի 12-ին, ժամը 12:30-ին ահազանգ էր ստացվել, որ Արարատի մարզի Ուրցաձոր գյուղից մոտ 20 կմ հյուսիս՝ «Խոսրովի անտառ» պետական արգելոց պետական ոչ առևտրային կազմակերպության «Զիմա» կոչվող տարածքում այրվում է բուսածածկ տարածք: Նախնական տվյալների համաձայն ՝ 200-250 հա տարածքում այրվում է բուսածածկ և անտառածածկ տարածք: