Վճռաբեկ դատարանն Արման Կատունյանի պաշտպանների բողոքը թողել է առանց քննության

Գյումրիում 2014թ. հուլիսի 24-ին պատգամավոր Վարդեւան Գրիգորյանի եղբորը՝ Հարություն Գրիգորյանին սպանելու համար 3 տարվա ազատազրկման դատապարտված Արման Կատունյանի պաշտպանները վճռաբեկ բողոքը մերժվել է:

Վճռաբեկը որոշել է բողոքը թողնել առանց քննության:

Հիշեցնենք, որ Վերաքննիչն արդեն մասնակի բավարարել էր Կատունյանի պաշտպաններ Լուսինե Սահակյանի եւ Երվանդ Վարոսյանի կողմից ներկայացրած բողոքը՝ դադարեցնելով ամբաստանյալի նկատմամբ ՀՀ քրեական օրենսգրքի 235-րդ հոդվածի 1-ին մասով (ապօրինի կերպով զինամթերք հանդիսացող փամփուշտ պահելը) իրականացվող քրեական  հետապնդումը եւ կրճատելով ազատազրկման ձեւով նշանակված պատժաչափը 3 ամսով: Կատունյանը դատապարտվեց 3 տարվա ազատազրկմանը, որը Շիրակի մարզի ընդհանուր իրավասության դատարանի դատավճռով նշանակվել էր հոգեկան խիստ հուզմունքի վիճակում կատարված սպանության համար։

Ավելի վաղ NEWS.am-ը հայտնել էր, որ Շիրակի մարզում 2014թ. hուլիսի 24-ին ժամը 16:00-ի սահմանում Գետք համայնքի չօգտագործվող ֆերմաներից մեկի տարածքում գտել են Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով: Կասկածյալը` Արման Կատունյանը, ոստիկանություն էր ներկայացել ինքնակամ եւ խոստովանել մեղքը։

Կատունյանին մեղադրանք էր առաջադրվել Քրեական օրենսգրքի 105-րդ հոդվածով (Հոգեկան խիստ հուզմունքի վիճակում կատարված սպանությունը) եւ 235-րդ հոդվածով (Ապօրինի կերպով զենք կրելը)։