Հակաբեղմնավորիչ հաբերը վատթարացնում են տեսողությունը

The Telegraph-ի փոխանցմամբ, այս դեպքում հատկապես կարեւոր է, թե որքան ժամանակ է կինը հակաբեղմնավորիչ հաբեր օգտագործել: Սա հիմնականում վերաբերվում է այն կանանց, ովքեր այս միջոցից օգտվում են ավելի քան երեք տարի:

Հակաբեղմնավորիչների ընդունման այսպիսի ժամանակահատվածի դեպքում գլաուկոմայով հիվանդանալու վտանգը կրկնապատկվում է: Այս դեպքում գլխավոր խնդիրը կանացի էստրոգեն հորմոնն է: Այն ժամանակակից հակաբեղմնավորիչների հիմնական բաղադրիչն է:

Բացի այդ, էստրոգենը կուրություն առաջացնող գլխավոր պատճառներից է: Գլաուկոմայի ազդեցության արդյունքում տեսողական նյարդին անդառնալի վնաս է հասցվում, որը չի վերականգնվում:

Այդ պատճառով, հետազոտության հեղինակները կարծում են, որ հակաբեղմնավորիչներ օգտագործող կանայք պետք է պարտադիր բուժզննում անցնեն ակնաբույժի մոտ, քանի որ գլաուկոմայով հիվանդանալու հավանականությունը շատ մեծ է: Նման հետազոտություններ անցկացվել են նաեւ նախկինում, եւ գիտնականները դրանք կապում են նաեւ տեսողական այլ խնդիրների հետ:

Ինչ վերաբերում է նոր հետազոտություններին. փորձագետները հավաքել են 40-ից բարձր տարիքի շուրջ 3.500 կանանց առողջությանը վերաբերող տվյալներ: Դրանք վերցված են 2005-ից մինչեւ 2008 թվականն ընկած ժամանակահատվածից: Գիտափորձի յուրաքանչյուր մասնակցի հարցաքննել են իր վերարտադրական առողջության վերաբերյալ: Բացի այդ, հատուկ թեսթերի միջոցով ստուգել են մասնակիցների տեսողությունը: Պարզվել է, որ եթե կանայք հակաբեղմնավորիչներ օգտագործել են երեք տարուց ավելի, նրանց մոտ հաճախ գլաուկոմա է ախտորոշվել՝ անկախ հակաբեղմնավորիչների տեսակից: