Ահա այն ամենը, ինչ հայտնի է iPhone 8-ի մասին

Համաշխարհային հասարակությունը սպասում է նրան, որ գալիք սեպտեմբերին Apple ընկերությունը կներկայացնի նոր iPhone-ը։ Այդ կապակցությամբ համացանցում միլիոնավոր լուրեր են պտտվում, որոնք փորձում են բացահայտել, թե ինչպիսին է լինելու Apple-ի նոր սմարթֆոնը։

Հենց ընկերությունը երբեք չի բացահայտում, թե ինչպիսին են լինելու սմարթֆոնները, սակայն ընկերությանը մոտ կանգնած որոշ աղբյուրներ տարածում են արժանահավատ ինֆորմացիա, որից կարելի է որոշ չափով պատկերացում կազմել սպասվելիք ներկայացման մասին։

BlogNews-ը Ձեզ է ներկայացնում այն ամենը, ինչ այս պահի դրությամբ հայտնի է այդքան շատ սպասված iPhone 8-ի մասին։

Apple-ը կներկայացնի 3 տեսակի iPhone սմարթֆոններ. դրանցից երկուսը կլինեն արդեն հայտնի iPhone 7 և 7 Plus մոդելների կատարելագործված տարբերակները, իսկ երրորդը կլինի նոր iPhone-ը։ Նոր սմարթֆոնի համար հնարավոր է մի քանի անվանում, որոնցից են iPhone Edition-ը, iPhone Pro-ն և OLED iPhone-ը, սակայն մենք առավել հակված ենք iPhone 8 տարբերակին։

Դժվար չէ կռահել, որ ողջ խառնաշփոթը առաջացրել է հենց նոր մոդելը, քանի որ այն պետք է ունենա լիովին նոր դիզայն, դիսփլեյ և տեխնոլոգիական հագեցվածություն։ Այն, ամենայն հավանականությամբ, կունենա OLED կոր, եզրային դիսփլեյ։

Տեսախցիկները կրկին երկուսը կլինեն, սակայն դրանց դիրքը կփոխվի՝ հորիզոնականից դառնալով ուղղահայաց։

Նոր դիսփլեյի պատճառով կանհետանա այդքան հայտնի «home» կոճակը, ինչի ֆունկցիոնալությունը կինտեգրվի հենց դիսփլեյի մեջ։

Դեռևս պարզ չէ, թե ինչ կլինի մատնահետք կարդացող սենսորի հետ. այն նույնպես կարող է ինտեգրվել դիսփլեյում, սակայն հավանական է նաև Face ID համակարգի ինտեգրումը, ինչը հնարավորություն կտա գործարկելու սմարթֆոնը հայացքով։

Ինչ վերաբերում է ծրագրային ապահովմանը, ապա iPhone 8-ը կաշխատի նոր iOS 11 համակարգով, ինչը շատ մեծ փոփոխություններ է ներառում։