Հայաստանը մեծացնում է արտաքին քաղաքականության տնտեսական բաղադրիչը

ՀՀ կառավարությունն արտաքին քաղաքականության տնտեսական բաղադ­րիչի զարգացման նպատակով հաս­տատեց երկրների թիրախավորման տնտեսական չափանիշնե­րը, թիրախային երկրների ցանկը, օտարերկրյա պետություններում ՀՀ դիվանագիտական ներկայացուց­չությունների տնտեսական գործու­նեության կատարողականի գնա­հատման չափանիշները: ՀՀ արտաքին գործերի փոխնախարար Շավարշ Քոչարյանը նշեց, որ ներկայացվել են առաջարկություններ՝ Հայաստանի դիվանագիտական ներկայացուցչությունների և հյուպատոսական հիմնարկների կողմից իրականացվելիք տնտեսական բնույթի աշխատանքների թիրախների հայտանիշների վերաբերյալ։

«Նախագծի ընդունման արդյունքում կբարձրացվի արտաքին տնտեսական քաղաքականության արդյունավետությունը, կընդլայնվի դեսպանատների և դիվանագիտական ներկայացուցչությունների ներգրավվածությունը ներդրումների ներգրավման, արտահանման զարգացման և զբոսաշրջության խթանման գործընթացում, որը կնպաստի ՀՀ կառավարության ծրագրի իրականացմանը»,- «Արմենպրես»-ի փոխանցմամբ, ասաց Քոչարյանը։

ՀՀ վարչապետ Կարեն Կարապետյանը նշեց, որ տնտեսական բաղադրիչը կներգրավի դեսպանների, դիվանագիտական կորպուսի հաշվետվության մեջ, կձևավորվեն հայտանիշներ՝ ըստ վարկանիշավորման կամ բաժանման՝ կախված Հայաստանի հետաքրքրություններից ու կապերից: «Տարվա վերջ լսելու ենք բոլոր հաշվետվությունները»,- ասաց վարչապետը:

Տնտեսական չափանիշների հիման վրա ընտրված թի­րախային երկրների մեկնարկային ցանկում ընդգրկվել են՝ Ռուսաս­տանը, ԱՄՆ-ը, Չինաստանը, Իրանը, Վրաստանը, ԱՄԷ-ն, Ֆրանսիան, Գերմանիան, Իտալիան, Կանադան, Լի­բանանը, Բենիլյուքսի երկրները՝ Բել­գիա, Նիդեռլանդներ, Լյուքսեմբուրգ: