Իշխանությունը կրկնում է իր սխալները

«Սասնա ծռերի» հարցում իշխանության որդեգրած քաղաքականությունը կարող է հանգեցնել կատաստրոֆայի հենց այդ իշխանության համար: 

Բացատրեմ, թե ինչումն է կայանում խնդիրը: Հասարակական տարբեր խմբերի, անհատներ, սոց. կայքերի ակտիվ օգտատերերի վերաբերմունքին մենք արդեն անդրադարձել ենք: Ավելին՝ հանդգնել ենք մարդկանց բաժանել պայմանական խմբերի՝ Ծռերի մասով: Ուստի հիմա չենք քննարկի խնդիրն այդ կողմից: Ավելի շատ հետաքրքրական է այլ ասպեկտը՝ վարձու օգտատերերի կողմից հայհոյական գրառումները կամ պիտակումները: Իհարկե կան նաև օգտատերեր, որոնք դա անում են առանց անձնական շահի, նրանք այդպես են մտածում և վերջ: Սակայն մեզ ավելի շատ հետաքրքրում է առաջին՝ շողոքորթների և վարձուների խումբը:

2008 թվականին, իշխանությունները սևացնելու հնարքը կիրառեցին Տեր-Պետրոսյանի նկատմամբ: Այդ ժամանակ, սոցիալական կայքերն այս տարածումը չունեին, ուստի նրանք դա փորձում էին անել եթերի միջոցով: Սակայն մատնվեցին ֆիասկոյի: 10 տարվա լռությունից վերադարձած ու 90-ականների բամբասանքի բեռն իր ուսերին կրող Տեր-Պետրոսյանին դա ոչ միայն չխանգարեց, այլ նաև մեծապես օգնեց: Եղավ այն, ինչ եղավ, դա մենք տեսել ենք:

Անշուշտ, մտադիր չեմ անգամ զուգահեռներ անցկացնել Տեր-Պետրոսյանի և «Սասնա ծռերի» միջև: Ասածս բացասական չընկալեք, սակայն համեմատության եզրեր, զուտ գործընթացների առումով չկան, պարզապես տեխնոլոգիաներն են նույնը: Հիմա ի՞նչ է անում իշխանությունը, բացի այն, որ զինված խմբի անդամներին ծեծում է դատարանի նկուղում: Ոստիկանության կամ այլ օղակների միջոցով, ստեղծել է օգտատերերի իրական ու ոչ իրական էջեր, որոնք առավոտից երեկո հայհոյում են խմբի անդամներին:

Սա կարող է հանգեցնել հետևյալին: Նախ, ծեծն արդեն իսկ թույլ է տալիս խմբի կողմնակիցներին, եթե անգամ կասկածում էին, ձեռք բերել այն վերջնական համոզմունքը, որ սրանցից առանց զենքի ազատում չկա: Այդ մտայնությունը կարող է պատել նաև խմբի գործողություններին չեզոք վերաբերվող մարդկանց: Դե իսկ հայհոյանքն արդեն այս ամենի լրացումն ու ամրագրումն է: Վաղուց ընդունված պրակտիկա է Հայաստանում ՝ ում հայհոյում է իշխանությունը, հասարակության մեծ մասը հենց նրանց է սիրում և ընդունում:

Հայաստանյան ներկայիս ներքաղաքական գաղջը, իշխանությունների սանձարձակ պահվածքը և ներքին ձայնս հուշում ենք, որ մենք դեռ կտեսնենք պպծ գնդերի գրավումներ:

Վահրամ Թոքմաջյան